لاہور میں کورونا ایس اوپیز کی خلاف ورزی پر 66مقدمات درج

تفصیلات کے مطابق  ملک بھر میں کورونا ایس اوپیز کے ساتھ عید الفطر منائی جارہی ہے ، عید کے موقع پر لاہور میں کورونا ایس او پیز کی خلاف ورزی پر کارروائیاں جاری رہیں۔ ڈی آئی جی آپریشنز کے مطابق فیس ماسک استعمال نہ کرنے پر41 افراد کے خلاف کارروائی کی گئی جبکہ دیگر ایس او پیز کی خلاف ورزی پر 25 مقدمات درج کئے گئے۔ عیدالفطر کے پہلے روز کورونا ایس او پیز کی خلاف ورزی پر 87 افراد کو حراست میں لیا گیا۔

دوسری جانب و زیراعلیٰ پنجاب عثمان بزدار نے صوبے میں  کورونا ایس او پیز پر سختی سے عملدر آمد کرانے کا حکم دیتے ہوئے کہا کہ کورونا وائرس کا پھیلاؤ روکنے کے لیے عوام کا تعاون نہایت اہم ہے۔عوام ایس او پیز کی مسلسل پابندی کریں کیونکہ سماجی فاصلہ برقرار رکھنے میں ہی عافیت ہے۔ عثمان بزدار نے کہا ہے کہ عید کی تعطیلات میں کورونا ایس او پیز کی خلاف ورزی برداشت نہیں کی جائے گی، عوام کو احتیاط کا دامن تھام کر کورونا کے ساتھ جینا سیکھنا ہوگا، متعلقہ ادارے اور محکمے کئے جانے والے اقدامات اور گائیڈ لائنز پر ہر صورت عملدرآمد کرائیں۔

واضح رہے کہ  پنجاب میں کورونا مریضوں کی تعداد 3لاکھ24ہزار 106ہوگئی ۔ جبکہ صوبے میں اب تک 9ہزار 282افراد جان سے ہاتھ دھو بیٹھے ہیں ۔

نیشنل کمانڈ اینڈ آپریشن سینٹر کی جانب سے جاری کیے گئے تازہ اعداد و شمارکے مطابق گزشتہ 24 گھنٹوں میں کورونا سے مزید48افراد چل بسے ۔ ملک میں  اموات کی مجموعی تعداد 19 ہزار384ہوگئی ہے،جبکہ  متاثرہ افراد کی مجموعی تعداد 8 لاکھ 73ہزار 220ہو گئی ہے ۔ گزشتہ 24 گھنٹوں میں مثبت کیسز کی شرح 8.19 فیصد رہی۔