ملک بھر میں آج یوم فلسطین منایا جا رہا ہے

تفصیلات کے مطابق یوم فلسطین منانے کی اپیل پاکستان علما کونسل نے کی تھی۔ یوم فلسطین ،     فلسطین کے خلاف اسرائیلی جارحیت کی مذمت اور فلسطینیوں سے بھرپور اظہار یکجہتی کے طور پر  منایا جا رہا ہے۔یوم فلسطین کے موقع پر ملک بھر میں فلسطینی عوام پر اسرائیلی مظالم کو اجاگر کیا جا رہا ہے جبکہ جمعہ کے اجتماعات میں خصوصی طور پر فلسطین کی موجودہ  صورتحال پر روشنی ڈالی جا رہی ہے۔علمائے کرام فلسطین پر حالیہ اسرائیلی جارحیت کے حوالے سے آیندہ حکمت عملی پر بھی غور کریں گے ۔

علاوہ ازیں وزیراعظم عمران خان نے فلسطینی صدر محمود عباس سے ٹیلی فونک رابطہ کیا، فلسطینی صدر اور وزیراعظم نے فلسطین کی موجودہ صورتحال پر گفتگو کی۔ عمران خان نے بے گناہ فلسطینیوں پرمظالم اور مسجد اقصیٰ میں عبادت کے دوران اسرائیلی حملوں کی شدید مذمت کرتے ہوئے  کہا کہ پاکستانی قیادت مشکل وقت میں فلسطینیوں کے ساتھ کھڑی ہے۔ وزیراعظم عمران خان نے فلسطینیوں کے حقوق اور ان کی منصفانہ جدوجہدکے لئے پاکستان کی مستقل حمایت کااعادہ کیا۔

واضح رہے کہ غزہ میں صیہونی فورسز کے تازہ حملوں میں شہید فلسطینیوں کی تعداد 113 تک پہنچ گئی جن میں31 بچے بھی شامل ہیں۔