انسداد بجلی چوری مہم کےدوران بجلی چوری میں ملوث مزید 244افراد گرفتار، لیسکو

لاہور الیکٹرک سپلائی کمپنی (لیسکو) کی جانب سے انسداد بجلی چوری مہم کے58ویں روز بجلی چوری میں ملوث مزید 244افراد کو پکڑ لیا گیا جن میں سے 243کے خلاف اندراج مقدمہ کی درخواستیں دائر کردی گئی ہیں جبکہ56ملزمان کے خلاف مقدمات درج کروا کے37کو گرفتار کرلیا گیا ہے۔

ترجمان لیسکو کے مطابق وزارت توانائی کی ہدایات پرلیسکو کے چیف ایگزیکٹو انجینئر شاہد حیدر کی زیر نگرانی لیسکو کے پانچوں اضلاع لاہور، شیخوپورہ، قصور، ننکانہ اور اوکاڑہ میں بجلی چوروں کیخلاف آپریشن اتوارکے روز بھی جاری رہا ،پکڑے جانے والے کنکشنز میں کمرشل10،زرعی 3اور231ڈومیسٹک تھے،ان تمام کنکشنز کو منقطع کرکے انہیں6 لاکھ 69 ہزار 71 یونٹس ڈٹیکشن بل کی مد میں چارج کئے گئے جن کی مالیت 1 کروڑ 16 لاکھ 57 ہزار 234 روپے ہے۔

ترجمان نے کہا کہ لیسکو ریجن میں 58 روز سے جاری آپریشن کے دوران کل 23 ہزار 713 کنکشن بجلی چوری میں ملوث پائے گئے، 23 ہزار 474 کنکشنز کیخلاف ایف آئی آرز کی درخواستیں جمع کروائی گئیں جن میں سے 22 ہزار 625 درخواستیں رجسٹرڈ ہو چکی ہیں،کل 11 ہزار 873ملزمان کو گرفتار کیا گیا ہے۔

لیسکو ترجمان کے مطابق بجلی چوروں کو اب تک 4 کروڑ 52 لاکھ 12 ہزار 509 یونٹس چارج کئے گئے ہیں جن کی مالیت 1 ارب 91 کروڑ 61 لاکھ 24 ہزار 205روپے ہے۔ واضح رہے بجلی چوروں کیخلاف آپریشنز وفاقی پاور ڈویژن کی جانب سے دی گئی ہدایات کے مطابق کئے جا رہے ہیں۔