حلف اٹھا کر کہتا ہوں کہ مجھے کسی نے پریس کانفرنس کرنے کا نہیں کہا، پرویز الہیٰ

تحریک انصاف کے صدر اور سابق وزیراعلیٰ پنجاب چوہدری پرویز الہی نے کورٹ پیشی کے موقع پر صحافیوں سے بات کرتے ہوئے کہا کہ حلف اٹھا کر کہتا ہوں کہ مجھے کسی نے پریس کانفرنس کرنے کا نہیں کہا، شریف برادران کو اب کچھ نہیں ملنا ان کو ملک بھر سے تو دور لاہور سے بھی امیدوار نہیں مل رہے۔ شریف برادران پاؤں پڑ کر یا کچھ بھی کر کے جیتنا چاہتے ہیں۔ چیئرمین پی ٹی آئی میرے ساتھ والے سیل میں ہیں 

 پی ٹی آئی کے صدر پرویزالہیٰ کو پنجاب اسمبلی میں غیر قانونی بھرتیوں کے کیس میں 14روزہ جوڈیشل ریمانڈ مکمل ہونے کے بعد لاہور ضلع کچہری میں پیش کیا گیا۔اینٹی کرپشن کی جانب پرویز الٰہی کے جوڈیشل ریمانڈ میں توسیع کی استدعا کی گئی جس پر جوڈیشل مجسٹریٹ عمران عابد نے جوڈیشل ریمانڈ میں مزید 14 روز کی توسیع کردی اور انہیں ملاقات کی اجازت بھی دے دی۔

کمرہ عدالت میں صحافیوں سے غیر رسمی بات کرتے ہوئے سابق وزیراعلیٰ پنجاب پرویزالہیٰ کا کہنا تھا کہ خلف اٹھا کر کہتا ہوں کہ مجھے آج تک کسی نے پریس کانفرنس کا نہیں کہا، سارے ادارے ہمارے اپنے ہیں سب کے ساتھ اچھے تعلقات چاہتے ہیں۔ چیئرمین پی ٹی آئی میرے ساتھ والے سیل میں ہیں، بہت سے لوگ ان سے ملاقات کےلئے آتے ہیں۔

پرویز الٰہی کا کہنا تھا کہ الیکشن کی تاریخ سپریم کورٹ کے کہنے پر ملی ہے اب الیکشن اپنے وقت پر ہوں گے کیونکہ سپریم کورٹ کے حکم کی خلاف ورزی نہیں کی جا سکتی۔اس الیکشن میں دھاندلی کا کوئی چانس نہیں، کسی نے کوشش کی تو عوام ڈبوں پر بیٹھ جائیں گے۔ شریف برادران کو اب کچھ نہیں ملنا ان کو ملک بھر سے تو دور لاہور سے بھی امیدوار نہیں مل رہے، چیئرمین پی ٹی آئی کو اتنے ووٹ پڑیں گے جس کی کوئی حد نہیں۔

سابق وزیراعلیٰ نے کہا کہ ہمارے اسٹیبلشمنٹ کے ساتھ ہمیشہ ہی اچھے تعلقات رہے ہیں، چیئرمین پی ٹی آئی کے ساتھ کھڑے ہیں اور کھڑے رہیں گے۔لکھ کر دیتا ہوں کہ شیخ رشید پاکستان تحریک انصاف کے ٹکٹ پر الیکشن لڑیں گے۔