لاہور میں لاک ڈاؤن میں نرمی کردی گئی

تفصیلات کے مطابق  لاہور میں  لاک ڈاؤن میں نرمی کردی گئی ہے۔  شادی ہالز مارکیز کو ایک مرتبہ پھر نظر انداز کر دیا گیا ہے۔ 17 مئی سے مارکیٹیں اور دکانیں رات 8 بجے تک کھولنے کا فیصلہ کیا گیا ہے۔ لاہور کی تمام مارکیٹیں اور دکانیں 17 مئی سے کھولنے کی اجازت ہے۔تمام دفاتر معمول کے اوقات کار کے تحت 17 مئی سے کھلیں گے تاہم دفاتر میں 50 فیصد حاضری رکھی جائے گی۔

جی این این کے مطابق لاہور انٹر سٹی اور انٹرا سٹی ٹرانسپورٹ بحال کرنے کا فیصلہ بھی کیا گیا ہے۔  انٹرا سٹی اور انٹر سٹی ٹرانسپورٹ 17کے بجائے 16 مئی سے بحال کی جائے گی اور  ٹرینیں 70 فیصد مسافروں کے ساتھ چلانے کا بھی فیصلہ کیا گیا ہے۔

اس سےقبل  وفاقی وزیر اسد عمر کی زیر صدارت این سی او سی کا اہم اجلاس ہوا تھا، جس میں عید کے دوران ایس او پیز پر عملدرآمد کا جائزہ لیا گیا۔ نیشنل کمانڈ اینڈ آپریشن سنٹر نے عید تعطیلات میں ایس او پیز پر عملدرآمد سے متعلق اطمینان کا اظہار کیا تھا۔

این سی او سی نے اجلاس میں فیصلہ کیا تھاکہ 17 مئی سے مارکیٹیں اور دکانیں رات 8 بجے تک کھلی رہیں گی، مارکیٹوں اور دکانوں کے اوقات کار 17 مئی سے تاحکم ثانی یہی رہیں گے، 17 مئی سے سرکاری اور نجی دفاتر کے اوقات کار معمول کے مطابق ہوں گے، دفاتر میں ملازمین کی 50 فیصد حاضری کی اجازت ہوگی، 50 فیصد عملہ گھر اور 50 فیصد دفاتر میں کام کرے گا۔

این سی او سی نے کہا تھا کہ 19 مئی کے اجلاس میں آئندہ کے لائحہ عمل کا فیصلہ کیا جائے گا، عوام ایس او پیز پر عملدرآمد کو یقینی بنائیں، عوام ترجیحی بنیادوں پر 1166پر ویکسین کی رجسٹریشن کو یقنی بنائیں۔ نیشنل کمانڈ اینڈ آپریشن سنٹر نے متعلقہ اداروں اور ایجنسیوں کو سختی سے ایس او پیز پر عملدرآمد کی مانیٹرنگ کا حکم دیا۔