پاک فوج الیکشن میں ہر ممکن تعاون فراہم کرے گی

پاک فوج کے شعبہ برائے تعالقاتِ عامہ آئی ایس پی آر کے مطابق آرمی چیف جنرل سید عاصم منیر، نشان امتیاز (ملٹری)کی زیر صدارت دو روزہ 261 ویں کورکمانڈرز کانفرنس ہوئی۔

آئی ایس پی آرکا کہنا ہے کہ پاک فوج آئندہ عام انتخابات میں الیکشن کمیشن آف پاکستان کو مطلوبہ اور ضروری تعاون فراہم کرے گی ۔ 

آئی ایس پی آرکا کہنا ہے کہ فورم نے مقبوضہ کشمیرمیں بھارتی فوج کی مسلسل جبراور انسانی حقوق کی قابل مذمت خلاف ورزیوں پر شدید تشویش کا اظہارکیا۔ شرکا نے بھارتی فوج کی معصوم شہریوں کے اغواء، تشدد اور قتل کی حالیہ کارروائیوں کی واضح الفاظ میں مذمت کی۔

کورکمانڈرکانفرنس میں شرکا نے شہدائے پاکستان سمیت ڈیرہ اسماعیل خان حملے کے شہدا کے ایصال و ثواب کیلئے فاتحہ خوانی بھی کی۔ فورم نے بالواسطہ اور بلاواسطہ خطرات کے خلاف پاکستان کی خود مختاری اور علاقائی سالمیت کے دفاع کے لیے پاک فوج کے عزم کا اعادہ کیا۔

کانفرنس کے شرکا نے مسلح افواج کے افسران، جوانوں، قانون نافذ کرنے والے اداروں اور شہریوں سمیت شہدا کی عظیم قربانیوں کو زبردست خراجِ تحسین پیش کیا، جنہوں نے ملک میں امن و استحکام کو یقینی بنانے کیلئے اپنی جانوں کی قربانیاں دیں۔