نگران وزیر اعلیٰ پنجاب کا تین ہسپتالوں کا اچانک دورہ

 پنجاب کے نگران وزیر اعلیٰ محسن نقوی نے پنجاب انسٹیٹیوٹ آف کارڈ یالوجی ،چلڈرن ہسپتال اور جنرل ہسپتال سمیت پنجاب کے تین ہسپتالوں کا دورہ کیا اور وہاں ترقیاتی کاموں پر پیشرفت کا جائزہ لیا۔

انہوں نے اس موقع پر چلڈرن ہسپتال کی مرکزی راہداری پر دس دن کےا ندر نئی ٹائلز لگانے کی ہدایت کی۔

محسن نقوی نے پنجاب انسٹیٹیوٹ آف کارڈیالوجی میں جاری تعمیراتی کام کا بھی جائزہ لیا اور چوبیس گھنٹے میں زیر زمین بائیو گیس پائپ  بچھانے کی ہدایت کی۔

 انہوں نے جنرل ہسپتال کی چار منزلوں کے توسیعی کام اور نئے تعمیر کردہ آپریشن تھیٹرز کا بھی معائنہ کیا۔

بعد میں نگران وزیر اعلیٰ نے شالامار باغ لاہور کا دورہ کیا۔ انہوں نے باغ کو اس کی اصل تاریخی شکل میں بحال کرنے کا اعلان کیا۔

نگران وزیر اعلیٰ پنجاب محسن نقوی نے ہسپتال عملے سے گفتگو بھی کی اور ان سے مسائل بھی دریافت کیے ۔

محسن نقوی نے ایم ایس سمیت تمام ہسپتال عملے کو مسائل حل ہونے کا عندیہ بھی دیا ۔