پاکستان تحریک انصاف کے رہنما مونس الہٰی کے ورانٹ گرفتاری جاری

لاہور کی عدالت نے پاکستان تحریک انصاف کے رہنما اور سابق وزیراعلی چوہدری پرویز الہٰی کے صاحبزادے مونس الہٰی کے ورانٹ گرفتاری جاری کردیئے۔

جوڈیشل مجسٹریٹ عمران عابد نے اینٹی کرپشن کی درخواست پر جعل سازی کے مقدمے میں مونس الہٰی کے ورانٹ گرفتاری جاری کئے۔اینٹی کرپشن کی طرف سے دی گئی درخواست میں مؤقف اختیار کیا گیا تھا کہ ملزم مونس الہٰی شامل تفتیش نہیں ہوا، خود کو روپوش کر رکھا ہے۔

واضح رہے کہ مونس الہٰی اس وقت ملک میں موجود نہیں ہیں اور گزشتہ سال ان کو وطن واپس لانے کے لیے قانونی عمل کا آغاز بھی کر دیا گیا تھا۔

خیال رہے کہ 13 نومبر 2023 کو احتساب عدالت لاہور نے قومی احتساب بیورو (نیب) کی درخواست پر سرکاری ٹھیکوں میں گھپلوں اور کِک بیکس لینے کے مقدمے میں سابق وفاقی وزیر مونس الہٰی کو اشتہاری قرار دے دیا تھا۔

احتساب عدالت نے مونس الہٰی کی جائیدادوں کا ریکارڈ طلب کرتے ہوئے ان کی جائیداد کو قرق کرنے کی کارروائی کا بھی آغاز کردیا۔