معرکہ حق میں بھارت کےمزید جہاز گراسکتے تھے لیکن ہم نےرحم کیا، پھر جنگ مسلط کی تو ہم تیار ہیں، صدرمملکت

گڑھی خدا بخش: صدر مملکت آصف علی زرداری نے کہا کہ ہم معرکہ حق کے دوران بھارت کےمزید جہاز گراسکتے تھے لیکن ہم نےتھوڑا رحم کیا، اگرکسی نےپھر سے جنگ مسلط کی تو ہم تیار ہیں۔

تفصیلات کے مطابق گڑھی خدا بخش میں بے نظیر کی 18 ویں برسی کی تقریب سے خطاب کرتے ہوئے آصف علی زرداری کا کہنا تھا کہ تمام جیالوں کو گڑھی خدابخش میں خوش آمدید کہتا ہوں۔

تقریب سے خطاب کرتے ہوئےاُنہوں نے کہا کہ پاکستان قیامت تک چلتا رہےگا، ہم نے فوج کا ایسا چیف بنایا جس نے بھارت کو منہ توڑجواب دیا، نریندرمودی کوپتا چل گیا جنگ کوئی کھیل نہیں ہے، پاکستانی اپنا دفاع کرنا جانتےہیں، شکرکرو ابھی ہم نےتمہارا لحاظ کیا ورنہ تمہارا وکرم جہاز بھی گرا دیتے۔

صدرِ مملکت کا کہنا تھا کہ یاد رکھو یہاں پیپلزپارٹی اور بھٹو کے وارث بیٹھے ہوئےہیں، ہم خود بھی لڑنےکو تیار ہیں، مادرِ وطن کوبچانے کے لیے یہ بھول جاؤ، روٹی ہوگی ،گولی ہوگی، یہ بھول جاؤ ہم  تمہیں گولیاں ماریں گے، نریندر مودی!چاردن تمہاری ٹانگیں کھڑی نہیں ہوسکیں۔

آصف زرداری نے کہا کہ وہ دل گردہ کہاں سےلاؤگےجوہمارے آرمی چیف،ایئرفورس چیف کا ہے، میرے ملٹری سیکرٹری نےبتایا سرجنگ شروع ہوگئی ہے، میرے ملٹری سیکرٹری نے کہا بنکرمیں چلے جائیں میں نے کہا شہادت آئی تویہاں ہی آئےگی۔

اُن کا کہنا تھا کہ جب بھی دھرتی ماں کوضرورت ہوگی توجان لڑادیں گے، میں جب جیلوں میں گیا تو کہا اِن مسائل کا خود ہی مقابلہ کروں گا، پیپلزپارٹی دشمنوں کےلیےتنہا ہی کافی ہے، جہاں بی بی نےکہا تھا وہاں پر جھنڈا لگایا تھا۔

ان کا مزید کہنا تھا کہ اگر کسی نے پاکستان کی طرف میلی آنکھ سے دیکھا تو یاد رکھے یہاں زرداری بیٹھا ہے، پاکستان کی طرف میلی آنکھ سے دیکھنے والا یاد رکھے یہاں پیپلزپارٹی اور جیالے موجود ہیں۔

گڑھی خدا بخش میں محترمہ بے نظیر بھٹو  کی برسی پر  ملک بھر ساے آئے ہوئے عقیدت مندوں کے اجتماع سے خطاب کرتے ہوئے صدر  آصف علی زرداری نے اپنے دسمبر 2007 کے تاریخی خطاب کا حوالہ دیا اور کہا، "پاکستان کھپے کا نعرہ بی بی کا ہی نعرہ تھا۔" 

صدر آصف علی زرداری نے واضح کیا کہ  ہم لڑنا نہیں چاہتے لیکن جو بھی ہاتھ ہماری طرف بڑھے گا تو  ہم جواب دیں گے، کوئی ہماری طرف میلی آنکھ سے دیکھےگا تو یاد رکھے ہمارا چیف ان کو ناکوں چنے چبوادے گا۔

بانی پی ٹی آئی پر شدید الفاظ میں تنقید کرتے ہوئے صدر آصف علی زرداری نے سابق وزیراعظم کا نام لئے بغیر کہا کہ ایک بیوقوف آدمی نے چار سال میں دنیا بھر سے ہمارے تعلقات خراب کیے۔