طالب علموں کیلئے اچھی خبر،محکمہ تعلیم سندھ کا آکسفورڈ یونیورسٹی کی اسکالرشپ کا اعلان

کراچی :محکمہ تعلیم سندھ نے اعلیٰ تعلیم کے خواہشمند طلبا کیلئے آکسفورڈ یونیورسٹی کی اسکالرشپ کا اعلان کر دیا۔

محکمہ تعلیم کے ترجمان کے مطابق گریجویٹ، ماسٹرز، ایم فل اور پی ایچ ڈی امیدواروں کیلئے اسکالرشپ دستیاب ہو گی،اسکالرشپ کیلئے سندھ کا ڈومیسائل اور شناختی کارڈ لازمی قرار دیا گیا ہے۔

ترجمان صوبائی محکمہ تعلیم کے مطابق امیدوار کا آکسفورڈ یونیورسٹی کے میرٹ پر پورا اترنا اورانگریزی زبان میں مہارت بھی ضروری ہے۔

ترجمان کے مطابق شارٹ لسٹ امیدواروں کے نام انٹرویو کے بعد فائنل کئے جائیں گے۔

اعلامیے میں بتایا گیا ہے کہ یہ اسکالرشپ بلاول بھٹو زرداری اور وزیراعلیٰ سندھ کے حالیہ آکسفورڈ یونیورسٹی کے دورے کے تناظر میں فراہم کی جا رہی ہے، جس کا مقصد سندھ کے طلبہ کو عالمی معیار کی تعلیم کے مواقع فراہم کرنا ہے۔