ایم کیو ایم پی نے کراچی سے قومی اسمبلی کے امیدواروں کی فہرست جاری کردی

کراچی: متحدہ قومی موومنٹ (ایم کیو ایم) پاکستان نے کراچی سے قومی اسمبلی کی نشستوں کے لیے پارٹی امیدواروں کی حتمی فہرست جاری کردی جس میں 18 نشستوں پر ایم کیو ایم کے 16 امیدوار میدان میں اتریں گے۔

تفصیلات کے مطابق کراچی سے قومی اسمبلی کی نشست این اے 232 کے لیے آسیہ اسحاق، این اے 233 سے جاوید حنیف ایم کیو ایم پاکستان کے امیدوار ہوں گے۔

قومی اسمبلی کی نشست این اے 234 سے ابوبکر، این اے 235 سے اقبال محسود اور این اے 236 سے حسن صابر ایم کیو ایم کے ٹکٹ پر الیکشن میں حصہ لیں گے۔

این اے 237 کی نشست پر رؤف صدیقی، این اے 238 سے صادق افتخار اور این اے 240 سے ارشد وہرہ ایم کیو ایم کے امیدوار ہوں گے جب کہ ایم کیو ایم کی جانب سے ڈاکٹر فاروق ستار این اے 241 جنوبی ضلع سے الیکشن لڑیں گے۔

مصطفیٰ کمال ضلع کیماڑی سے قومی اسمبلی کی نشست این اے 242 کے امیدوار ہوں گے جبکہ ایم کیو ایم پاکستان کی نمائندگی کے لیے ہمایوں عثمان این اے 243 سے امیدوار ہوں گے۔

قومی اسمبلی کی نشست این اے 244 سے ڈاکٹر فاروق ستار، این اے 245 سے حفیظ الدین، این اے 246 سے امین الحق اور این اے 247 سے مصطفیٰ کمال پارٹی کے امیدوار ہوں گے۔

کراچی کی نشست این اے 248 ضلع وسطی کے لیے ایم کیو ایم پاکستان کے ڈاکٹر خالد مقبول صدیقی امیدوار ہوں گے جب کہ احمد سلیم صدیقی قومی اسمبلی کی نشست این اے 249 اور فرحان چشتی این اے 250 سے امیدوار ہوں گے۔

ایم کیو ایم نے عام انتخابات 2024 کے لیے لیاری سے کسی امیدوار کو قومی اسمبلی کا ٹکٹ جاری نہیں کیا۔