پرانی سیاست کو دفن کرکے نئی سوچ کو سامنے لائیں، بلاول بھٹو کی عوام سے اپیل

ملتان میں میڈیا سے گفتگو کرتے ہوئے بلاول بھٹو زرداری نے کہا ہے کسانوں کو کسان کارڈ اور مزدوروں کو مزدور کارڈ دیں گے، عوام سے اپیل ہے کہ پرانی سیاست کو دفن کرکے نئی سوچ کو سامنے لائیں۔

چیئرمین پیپلزپارٹی نے کہا ہے 26 جنوری کو ملتان میں پیپلز پارٹی کا جلسہ ہوگا، ملکی حالات کو ٹھیک کرنے کی صلاحیت صرف پیپلز پارٹی میں ہے۔

انہوں نے کہا ہے کہ اپنے نظریے پر عملدرآمد کیلئے الیکشن جیتنا ہے، ہمارے اور دیگر جماعتوں کے نظریے میں فرق ہے، دیگر جماعتیں اشرافیہ کو ریلیف اور غریبوں کو تکالیف دیتی ہیں، ہم پاکستان کے نوجوانوں، مزدوروں، کسانوں اور صحافیوں کی نمائندگی کرتے ہیں، نوجوانوں کو یوتھ کارڈ کے ذریعے بااختیار بنائیں گے۔

بلاول بھٹو نے مزید کہا ہے کہ عوام ہی طاقت کا سرچشمہ ہیں، عوام کا لاڈلا بنیں گے، ملتان کے عوام کی تنخواہیں ڈبل کریں گے اور یہاں کے عوام کیلئے ایجنڈا لے کر آئے ہیں۔