پی ٹی آئی الیکشن کمیشن آف پاکستان کے خلاف توہین عدالت کے کیس سے دستبردار

پشاور: سپریم کورٹ کے بعد پاکستان تحریک انصاف (پی ٹی آئی) نے الیکشن کمیشن آف پاکستان (ای سی پی) کے خلاف توہین عدالت کا کیس پشاور ہائی کورٹ (پی ایچ سی) سے بھی واپس لے لیا۔

تفصیلات کے مطابق پی ایچ سی کے جسٹس عتیق شاہ اور جسٹس ارشد علی نے پی ٹی آئی کے انٹرا پارٹی انتخابات اور انتخابی نشان سے متعلق توہین عدالت کیس کی سماعت کی۔

سماعت کے دوران پی ٹی آئی کے وکیل شاہ فیصل ایڈووکیٹ نے عدالت کو بتایا کہ ‘سپریم کورٹ کے فیصلے کے بعد ہماری درخواست غیر موثر ہوگئی ہے، ہم اپنی درخواست واپس لیتے ہیں’۔

جس کے بعد عدالت نے الیکشن کمیشن کے خلاف توہین عدالت کیس نمٹا دیا۔

پی ٹی آئی نے عدالتی احکامات پر عملدرآمد نہ کرنے پر الیکشن کمیشن کے خلاف توہین عدالت کا مقدمہ دائر کیا تھا۔

اس سے قبل گزشتہ روز سپریم کورٹ نے دستبرداری کی بنیاد پر لیول پلیئنگ فیلڈ فراہم نہ کرنے سے متعلق پی ٹی آئی کی درخواست نمٹا دی تھی۔

چیف جسٹس آف پاکستان (سی جے پی) قاضی فائز عیسیٰ نے پی ٹی آئی کے وکیل لطیف کھوسہ سے پوچھا کہ کیا وہ مقدمہ چلانا چاہتے ہیں یا نہیں۔

پی ٹی آئی کے وکیل لطیف کھوسہ نے کہا کہ ہم الیکشن کمیشن کے خلاف توہین عدالت کی درخواست واپس لے رہے ہیں۔ ہم جمہوریت کی بقا کے لیے عوام کی عدالت میں جانے کو ترجیح دیں گے۔