9مئی مقدمات، شیخ رشید کی ضمانت منظور

9 مئی مقدمات میں سربراہ عوامی مسلم لیگ شیخ رشید اور اُن کے بھتیجے راشد شفیق کی درخواست ضمانت منظورکرلی گئی۔ انسداددہشت گردی عدالت کےجج اعجازآصف نےمحفوظ فیصلہ سناتے ہوئے ضمانت منظورکرلی۔

انسداد دہشت گردی عدالت نے شیخ رشید کی جی ایچ کیو اور تھاںہ سول لائن کیس میں ایک لاکھ روپے کے ضمانتی مچلکوں کے عوض ضمانت منظور کی۔ عدالت نے تھانہ ار اے بازار میں درج مقدمے میں شیخ رشید اور دیگر 25 ملزمان کی ضمانت منظور  کر لی 

عدالت نے جی ایچ کیو حملہ کیس میں گزشتہ روز فریقین کے دلائل مکمل ہونے پرفیصلہ محفوظ کیا تھا جبکہ شیخ رشید اور دیگر ملزمان اس کیس میں عبوری ضمانت پر رہا تھے۔

گزشتہ سماعت کے دوران پولیس نے شیخ رشید احمد کو گرفتارکرنے کی استدعا کی گئی تھی، تفتیشی افسر نے عدالت میں شیخ رشید کے بھتیجے شیخ راشد شفیق کی 9 مئی کی ویڈیو چلا کر دکھائی تھی۔

یاد رہے کہ9 مئی کے حوالے سے درج مقدمات میں 9 دسمبر 2023 کو شیخ رشید کی عبوری ضمانتوں میں 4 جنوری تک توسیع کی گئی تھی۔انسدادِ دہشت گردی عدالت نے کیسز کا مکمل ریکارڈ پیش نہ کرنے پر برہمی کا اظہاربھی کیا تھا۔

آج فیصلے سے قبل انسداد دہشتگردی عدالت کے باہرمیڈیا سے گفتگومیں شیخ رشید نے کہا کہ چلے کے بعد طبیعت کافی ناساز ہے، بولنےاورچلنے میں تکلیف ہے لیکن حوصلہ بلند ہے، ہارتا وہ ہے جوحوصلہ ہارتا ہے۔  کورٹ مارشل میں بھی اورکلاشنکوف کیس میں بھی جیل گیا تھا، اب بھی اگرجیل بھیجتے ہیں تو الیکشن جیتیں گے۔