غیر شرعی نکاح کیس، بانی چیئرمین پی ٹی آئی اور بشریٰ بی بی پر فرد جرم عائد

غیر شرعی نکاح کیس، بانی چیئرمین پی ٹی آئی اور بشریٰ بی بی پر فرد جرم عائد کر دی گئی، فرد جرم بشریٰ بی بی کی عدم موجودگی میں عائد کی گئی۔ دوران عدت نکاح کیس کی سماعت اڈیالہ جیل میں سول جج قدرت اللہ نے کی۔

سینئر سول جج قدرت اللّٰہ نے فرد جرم پڑھ کر سنائی ۔ فرد جرم سناتے وقت بانی چیئرمین پی ٹی آئی کمرہ عدالت میں موجود تھے تاہم بشریٰ بی بی کی غیر موجودگی پر عدالت نے برہمی کا اظہار کیا۔

وکلاء کا کہنا ہے کہ بشری بی بی طبی وجوہات کی بنیاد پر روانہ ہوئیں۔ وکلا نے فرد جرم عائد ہونے سے روکنے کی استدعا کی تھی۔ وکلاء کا استدعا میں کہنا تھا کہ بشریٰ بی بی موجود نہیں، فرد جرم عائد نہ کی جائے۔

دلائل سننے کے بعد جج قدرت اللہ نے فرد جرم عائد کردی۔