پاکستان کی ایران کی جانب سے فضائی حدود کی خلاف ورزی کی شدید مذمت

پاکستان نے ایران کی جانب سے اپنی فضائی حدود کی بلا اشتعال خلاف ورزی کی شدید مذمت کی ہے جس کے نتیجے میں دو بچے جاں بحق اور تین زخمی ہو گئے۔

دفتر خارجہ کی ترجمان نے ایک بیان میں کہا کہ پاکستان کی خودمختاری کی یہ خلاف ورزی ناقابل قبول ہے اور اس کے سنگین نتائج نکل سکتے ہیں۔بیان میں مزید کہا گیا کہ یہ امر اس سے بھی زیادہ تشویشناک ہے کہ پاکستان اورایران کے درمیان متعدد مواصلاتی ذرائع کی موجودگی کے باوجود یہ غیرقانونی کارروائی ہوئی۔

پاکستان کی جانب سے پہلے ہی تہران میں ایرانی وزارت خارجہ میں متعلقہ سینئر عہدیدار کیساتھ شدید احتجاج درج کرایا جاچکا ہے۔ بیان میں کہا گیا کہ پاکستان کی خودمختاری کی اس صریحاً خلاف ورزی کی شدید مذمت کے لئے ایرانی ناظم الامور کو دفتر خارجہ طلب کیا گیا ہے۔

بیان میں مزید کہا گیا کہ پاکستان نے ہمیشہ کہا ہے کہ دہشت گردی خطے کے تمام ممالک کیلئے مشترکہ خطرہ ہے جس کے لئے مربوط کارروائی کی ضرورت ہے۔