قومی و صوبائی اسمبلیوں کی جنرل نشستوں پر الیکشن لڑنے والے امیدواروں کی تفصیلات

الیکشن کمیشن نے ملک بھر سے قومی و صوبائی اسمبلیوں کی جنرل نشستوں پر الیکشن لڑنے والے امیدواروں کی تفصیلات جاری کر دی ۔

قومی اور صوبائی اسمبلی کی نشستوں پر مجموعی طور پر 17 ہزار 816 امیدوار میدان میں اترے، قومی اسمبلی کے 266 حلقوں میں 5 ہزار 121 امیدوار میدان میں اتریں گے جبکہ صوبائی اسمبلیوں کی نشستوں پر 12 ہزار 695 امیدوار انتخابات میں حصہ لے رہے ہیں۔

قومی اور صوبائی اسمبلیوں کےلئے 11 ہزار 785 آزاد امید وار، 882 خواتین اور 4 خواجہ سرا بھی الیکشن دوڑ میں حصہ لے  رہے ہیں۔ قومی اسمبلی کی جنرل نشستوں پر سیاسی جماعتوں کے 1873 امیدوار الیکشن لڑیں گے۔

قومی اسمبلی کی جنرل نشستوں پر 3 ہزار 248 امیدوار آزاد حیثیت میں انتخاب لڑیں گے جبکہ صوبائی اسمبلی کی نشستوں پر 8 ہزار 537 آزاد اور 4 ہزار 158 سیاسی جماعتوں کے امیدوار حصہ لے رہے ہیں۔

پنجاب اسمبلی کی نشستوں پر 6 ہزار 710، سندھ اسمبلی کی نشستوں پر 2 ہزار 878، خیبرپختونخوا اسمبلی کی نشستوں پر 1834، بلوچستان اسمبلی کی نشستوں پر 1273 امیدوار حصہ لے رہے ہیں۔