غیر شرعی نکاح کیس، اسلام آباد ہائیکورٹ نےگواہوں کےبیانات قلمبند کرنے سے روک دیا

غیر شرعی نکاح کیس، اسلام آباد ہائیکورٹ نےعمران خان اور بشریٰ بی بی کے خلاف گواہوں کےبیانات قلمبند کرنے سے روک دیا۔

عدت میں نکاح کیخلاف درخواست پرسماعت چیف جسٹس اسلام آباد ہائیکورٹ عامر فاروق کی۔ بانی چیئرمین پی ٹی آئی اوربشری بی بی کے وکیل سلمان اکرم راجہ عدالت میں پیش ہوئے اور کہا کہ ساری ڈسٹرکٹ جوڈیشری اڈیالہ جیل میں موجود ہے، آج انہوں نےگواہوں کےبیانات ریکارڈ کرنے ہیں۔

اس پر چیف جسٹس ہائیکورٹ نے استفسار کیاکہ گواہوں کےبیان ریکارڈ کرانےکو روک دیتےہیں کیس بتائیں ہے کیا؟ وکیل کا کہنا تھا کہ ان کے بیان کوبھی مان لیا جائے تو48 دنوں کے بعد نکاح ہوا۔ اس پر جسٹس عامر فاروق نے استفسار کیا کہ عمومی طور پر عدت کا دورانیہ کتنا ہوتا ہے ؟

وکیل نے بتایا کہ عمومی طور پر90 روزدورانیہ ہوتا ہے لیکن مفتی تقی عثمانی نے اس میں وضاحت کی ہے، اس ججمنٹ کے ہوتے ہوئے کمپلینٹ سرے سے بنتی ہی نہیں، یہ بات تسلیم شدہ ہےکہ 496 بی میں دوگواہ موجود نہیں ہیں۔ اس کے باوجود چارج فریم ہوچکا گواہوں کے بیانات آج ریکارڈ کرنے کیلئے رکھا ہوا ہے۔

اسٹیٹ کونسل زوہیب گوندل نے اس موقع پرکہا کہ اس میں راجہ رضوان عباسی صاحب وکیل ہیں ،وہ آجائیں پھر ان کو سن لیا جائے تب تک اسٹے نا دیا جائے۔عدالت نے اس پر سرکاری وکیل سے مکالمہ کیا کہ انہوں نے اپنا کیس بیان کیا ہے، آپ اپنا فتوی لے آئیں دیکھ لیں گے۔

پی ٹی آئی سلمان اکرم راجہ نے کہا کہ عدت کی مدت سے متعلق سپریم کورٹ کا فیصلہ موجود ہے۔ اس پر جسٹس عامر فاروق نے استفسار کیا کہ فرض کریں کہ اس متعلق سپریم کورٹ کا فیصلہ موجود نہ ہو، قانون کے مطابق تونکاح اگرعدت میں ہوا تووہ بعد میں ریگولرائزہوجاتا ہے۔ اگرنکاح باقاعدہ بھی نہیں ہوتا تواس میں جرم کیا ہے؟ آپ نے اس درخواست میں کیا چیلنج کیا ہے؟

اس پر پی ٹی آئی وکیل نے بتایا کہ ہم نے بانی چیئرمین پی ٹی آئی اور بشریٰ بی بی کو جاری کئے جانے والے سمن چیلنج کیے ہیں۔ عدالت نے عدت کے دوران نکاح کیس میں گواہان کے بیانات قلمبند کرنے سے روکتے ہوئے شکایت کنندہ خاور مانیکا کو 25 جنوری کیلئے نوٹس جاری کر دیئے

عدالت ننکاح کیس میں گواہوں کےبیانات ریکارڈ کرنے سے روکتے ہوئے کیس کی آئندہ سماعت 25 جنوری تک ملتوی کردی۔