غزہ کی جنگ بندی تک اسرائیل سے مذاکرات نہیں ہونگے ،سعودی عرب

سعودی عرب نے کہا ہے کہ جب تک غزہ میں جنگ بندی نہیں ہوتی وہ اسرائیل کو تسلیم کرنے کے معاہدے سے متعلق مذاکرات کو آگے نہیں بڑھائے گا۔

امریکہ میں سعودی عرب کی سفیر شہزادی ریما بنت بندر نے سوئٹزر لینڈ کے شہر ڈیووس میں عالمی اقتصادی فورم کے پینل انٹرویو میں بات کرتے ہوئے کہا یہ بات سمجھنا سب سے زیادہ اہم ہے کہ سعودی عرب نے تعلقات کو معمول پر لانے کو اپنی پالیسی کا محور نہیں بنایا بلکہ اس کے بجائے امن اور خوشحالی کو اپنی پالیسی کی بنیاد بنایا ہے۔

یاد رہے کہ سعودی عرب نے کبھی بھی اسرائیل کو تسلیم نہیں کیا اور نہ ہی 2020 کے امریکی ثالثی والے ابراہیم معاہدے میں شامل ہوا۔ جبکہ خلیجی ممالک بحرین اور متحدہ عرب امارات کے علاوہ مراکش نے اسرائیل کے ساتھ باضابطہ تعلقات قائم کر لیے ہیں۔