پاکستانی گلوکارہ مہناز بیگم کی برسی آج منائی جارہی ہے

آج مشہور پاکستانی گلوکارہ مہناز بیگم کی برسی منائی جارہی  ہے ۔ چار دہائیوں تک آواز کا جادو جگانے والی گلوکارہ مہناز بیگم سن 1955 میں کراچی میں پیدا ہوئیں۔

مہناز کا اصل نام کنیز رضا تھا وہ برصغیر کی معروف مغنیہ اور سوز خواں کجن بیگم کی صاحب زادی تھیں ۔

انہوں نے سرسید گرلز کالج سے بی اے کیا اور 1972 میں باقاعدہ طور پر فن موسیقی میں قدم رکھا۔

امیر امام نے مہناز بیگم کو پاکستان ٹیلی ویژن کے پروگرام 'نغمہ زار' کے ذریعے عوام سے متعارف کروایا۔ ٹیلی وژن پر گائیکی کے بعد ان کی شہرت فلم اسکرین تک جاپہنچی۔ مہناز نے اس کے بعد کئی برسوں تک ریڈیو، ٹی وی اور فلم میں اپنی مسحورکن آواز سے لاتعداد گیتوں کو پہچان دی ۔

انہوں نے مجموعی طور پر 1500 سے زائد گانے ریکارڈ کروائے۔ حکومتِ پاکستان نے گلوکارہ مہناز کی فنی خدمات کے اعتراف میں انھیں صدارتی تمغہ برائے حسن کارکردگی سے بھی نوازا گیا  ۔

مہناز بیگم طویل عرصے سے علیل تھیں 19جنوری 2013 کو امریکا سفر کے دوران راستے میں ہی ان کی حالت بگڑ گئی ۔ جہاز کو بحرین اتار کر انھیں بحرین کے ایک اسپتال منتقل کیا گیا جہاں وہ اپنے خالق حقیقی سے جا ملیں ۔ کراچی میں مدفون ہیں ۔