پاکستان کی آدھی تاریخ ڈکٹیٹر شپ میں گزری، جسٹس اطہر من اللہ

اسلام آباد ہائیکورٹ کے سابق چیف جسٹس اور سپریم کورٹ کے جج جسٹس اطہر من اللہ کا کہنا ہے کہ پاکستان کی آدھی تاریخ ڈکٹیٹر شپ میں گزری جس میں آزادی رائے ممکن نہیں۔ بدقسمتی سے پاکستان میں ایک عرصہ ڈکٹیٹر شپ رہی، وقت کے ساتھ سچائی خود سامنے آتی ہے،سچ کو پنپنے دیا ہوتا تو پاکستان دولخت نہ ہوتا۔

اسلام آباد میں سپریم کورٹ کے ایک سیمینار سے خطاب کرتے ہوئے جسٹس اطہر من اللہ نے کہا کہ پاکستان کی آدھی تاریخ ڈکٹیٹر شپ میں گزری ہے، آغاز سے ہی آزادی صحافت پر قدغنیں لگی ہیں۔ جج کو کسی بھی تنقید سے گھبرانا نہیں چاہیے،یہی عدلیہ کا امتحان ہے، جج تنقید کا اثر لے تو یہ حلف کی خلاف ورزی ہے۔ ہر تنقید کرنے والے کا عدالت پر اعتماد ہونا چاہیے۔

جسٹس اطہر من اللہ نے کہا کہ ڈکٹیٹر شپ میں آزادی اظہار رائے ممکن ہی نہیں، اظہار رائے میں صحافیوں کا کلیدی کردار ہے۔ اگر کوئی غلط کہتا ہے تو وہ خود بے نقاب ہو جائے گا۔ ہم جوابدہ ہیں، اظہار رائے کو بلند رکھنے کے لیے کوڑے بھی کھائے ہیں۔ کسی خاتون یا بچے کی شناخت ظاہر کرنا صحافی قواعد کے خلاف ہے۔

ان کا کہنا تھا کہ اظہار رائے کو کبھی دبانے کی کوشش نہیں کرنی چاہیے،1971 میں مغربی پاکستان کے لوگوں کی یکسر الگ تصویر دکھائی گئی، سچ کو ہمیشہ دبانے کی کوشش کی گئی، سچ دباتے دباتے آج اس صورتحال پر پہنچے ہیں۔

جسٹس اطہر من اللہ نے کہا کہ میں نے کبھی کسی کی پرواہ نہیں کی، بحیثت جج ہم پبلک پراپرٹی ہیں، ہمارے فیصلے خود سچ ثابت کریں گے، جھوٹ جتنا بھی بولاجائے آخرکار سچ سامنے آجاتا ہے، سچ کو پنپنے دیا ہوتا تو پاکستان دولخت نہ ہوتا۔ اظہار رائے کو پہچانا ہوتا تو ملک دولخت نہ ہوتا اور نہ لیڈر پھانسی لگتے۔

انہوں نے مزید کہا کہ اظہار رائے ہوگا تو ہم عظیم قوم بن سکتے ہیں، معاشرہ مرضی کا فیصلہ اور مرضی کی گفتگو چاہتا ہے۔