اسرائیلی فوج کا شام کے دارالحکومت دمشق میں فضائی حملہ، ایرانی کمانڈر سمیت 5افراد ہلاک

اسرائیلی فوج نے شام کے دارالحکومت دمشق میں ایرانی سفارتخانے کے قریب واقع ایک عمارت پر بمباری کی جس کے نتیجے میں ایرانی پاسداران انقلاب کے ایک انٹیلی جنس کمانڈر سمیت پانچ افراد ہلاک ہوگئے۔ حملے کے وقت عمارت میں ایران کے حمایت یافتہ گروپوں کے نمائندوں کا اجلاس ہو رہا تھا۔

اسرائیلی فضائیہ نے دمشق کے علاقے ماذے میں اس عمارت پر میزائل داغے جس میں شامی حکومت کے ایرانی مشیر مقیم تھے۔مشرق وسطٰی میں ایران کے ایک حمایت یافتہ گروپ سے تعلق کے حامل سرکاری افسر نے بتایا ہے کہ جس عمارت پر حملہ کیا گیا وہ ایرانی پاس دارانِ انقلاب کے افسران کے زیر استعمال تھی۔

بحیرہ احمر میں اور اس کے باہر اسرائیلی تجارتی جہازوں اور اسرائیلی علاقوں کو راکٹوں اور میزائلوں سے نشانہ بنائے جانے پر اسرائیل نے حزب اللہ اور دیگر ایرانی حمایت یافتہ گروپوں کے ٹھکانوں پر حملے کیے ہیں۔ یمن کی حوثی ملیشیا کو امریکی فوج نے نشانے پر لیا ہے۔