پاکستان کا قطر کوپیشہ ورانہ افرادی قوت کی فراہمی کا وعدہ

پاکستان نے قطر کی معاشی ترقی میں مدد دینے کے لئے انتہائی ہنرمند اور پیشہ وارانہ افرادی قوت کی فراہمی جاری رکھنے کے عزم کااظہار کیا۔

اس عزم کااظہار بیرون ملک پاکستانیوں اور انسانی وسائل کی ترقی کے بارے میں وزیراعظم کے معاون خصوصی جواد سہراب ملک نے دوحہ میں قطر کے امور داخلہ کے وزیر شیخ عبدالعزیز بن فیصل الثانی سے ملاقات کے دوران کیا۔

دونوں رہنماؤں نے سلامتی کے شعبوں میں تعاون کا جائزہ لیا اور دوطرفہ تعاون کو وسعت دینے پر زور دیا۔

معاون خصوصی نے قطر کے بنیادی ڈھانچے کی ترقی میں بیرون ملک پاکستانیوں کے اہم کردار کو اجاگر کیا۔

وزیراعظم کے معاون خصوصی نے ملک بھر میں مزید قطر ویزہ مراکز کے قیام کی تجویز پیش کی تاکہ پاکستانی افرادی قوت کو قطر بھجوانے کے عمل کو یقینی بنایا جاسکے۔

انہو ںنے غزہ کے متاثرین کیلئے امدادی سرگرمیوں اور تنازعہ کے حل کیلئے قطر کی کوششوںکی بھی تعریف کی اور کہا پاکستان قطر کے موقف کی حمایت کرتاہے۔