کراچی میں شادی والے گھر صف ماتم ، ایک روز قبل دولہا قتل

کراچی میں شادی والے گھر صف ماتم بچھ گیا، ایک روز قبل دولہا کو قتل کر دیا گیا۔ مقتول اسامہ کی لاش گزشتہ روز عوامی کالونی کورنگی سے برآمد ہوئی تھی۔پولیس نے والد کی مدعیت میں قتل کی دفعات کے تحت مقدمہ درج کرلیا ہے۔

ایف آئی آر میں مقتول کے والد نے پولیس کو بتایا کہ میرے بیٹے اسامہ کو اس کا دوست طلحہ اپنی کار میں لے کر گیا تھا، جمعے کو بیٹے کی مایوں کے لیے دلہن کے گھر جانا تھا، دلہن کے گھر سے واپس آئے تو اسامہ گھر پر موجود نہیں تھا۔

اسامہ کو کال کی تو نمبر بند تھا، بعدازاں پولیس کو اس کی لاش ملی، اسپتال میں لاش دیکھی تو بیٹے کو شناخت کیا۔ والد نے پولیس کو بیان دیا کہ طلحہ نے ہی اس کے بیٹے کو قتل کیا ہے۔

دوسری جانب پولیس نے واردات میں استعمال ہونے والی گاڑی برآمد کرلی ہے، گاڑی سے خون کے نمونے بھی حاصل کرلیے گئے ہیں۔

پولیس حکام کے مطابق طلحہ نے دیگردو ساتھیوں کے ہمراہ اسامہ کو فائرنگ کرکے قتل کیا، طلحہ حراست میں ہے جبکہ دیگر دو فرار ملزمان کی گرفتاری کی کوشش جاری ہے۔