2018 کے الیکشن سے پہلے اندارہ ہو گیا تھا کہ معاملات کس طرف جا رہے ہیں، رانا ثناء اللہ

سابق وزیرداخلہ و رہنما مسلم لیگ (ن) راناثنااللہ نے کہا ہے کہ 2018 کے الیکشن سے پہلے اندارہ ہو گیا تھا کہ معاملات کس طرف جا رہے ہیں، 8 فروری کے بعد مسلم لیگ ن حکومت بنائے گی۔ پارٹی ٹکٹوں کی تقسیم پر اختلافات معمول کی بات ہے۔

فیصل آباد میں تقریب سے خطاب میں رانا ثنا اللہ نے کہا کہ ہمارے دور حکومت میں دہشت گردی اور لوڈشیڈنگ ختم ہوئی، بحران کی ذمہ داری اُن پر ہے جنہوں نے ملک کو معاشی طور پر تباہ کیا۔ 2018 کے انتخابات کا نتیجہ سننے سے پہلے ہی معلوم تھا کہ کیا ہونے والا ہے۔

انہوں نے کہا کہ سازش کے تحت ایک شخص کو ملک پر مسلط کیا گیا،  پارٹی ٹکٹوں کی تقسیم پر اختلافات معمول کی بات ہے، تمام امیدواروں کومیرٹ پرٹکٹ دیئے،بھرپور کوشش ہےکہ کسی کوناراض نہ کریں لیکن یہ انتخابی مہم ہے۔

صدر مسلم لیگ ن پنجاب نے مزید کہا کہ میرے خلاف بڑا گھٹیا مقدمہ بنایا گیا، مجھے کہا گیا آپ خاموش ہو جائیں ورنہ انجام اچھا نہ ہو گا، ہم نے تو کوئی پریس کانفرنس نہیں کی ، گرفتاریاں سہہ کر بھی لیڈر شپ سے وفا نبھائی، ٹکٹوں کی تقسیم پر ایسا نہیں ہوسکتا کہ گلے شکوے نہ ہوں، ہمارے کارکنان نے ہمیشہ احتجاج کے دوران ڈسپلن کا راستہ اپنایا۔

سابق وزیرداخلہ نے کہا کہ ملکی مسائل کا حل صرف اور صرف ن لیگ ہے، ہمیں بھاری اکثریت سے کامیاب کروا کے ملک کی ترقی میں حصہ ڈالیں ۔