سیکرٹری جنرل یو این او کا غزہ میں جنگ بندی اور یرغمالیوں کی رہائی کا مطالبہ

اقوام متحدہ کے سیکرٹری جنرل انتونیو گوتریس نے غزہ میں انسانی بنیادوں پر جنگ بندی اور تمام یرغمالیوں کی غیرمشروط رہائی کا مطالبہ دہرایا ہے ، آج یوگنڈا کے دارالحکومت کمپالا میں ختم ہونے والے غیروابستہ تحریک کے سربراہ اجلاس سے خطاب کرتے ہوئے سیکرٹری جنرل نے کہاکہ اس جنگ سے اقوام متحدہ بھی متاثر ہوا ہے اوراس کے عملے کے 152 افراد ہلاک ہوچکے ہیں۔

انہوں نے کہاکہ لوگ نہ صرف بموں اور گولیوں سے بلکہ خوراک اور پینے کیلئے صاف پانی نہ ملنے سے بھی مررہے ہیں ہسپتالوں میں بجلی اور دوائیں نہیں ہیں اور لوگ جنگ سے بچنے کیلئے زمینوں کے انتہائی چھوٹے ٹکڑوں کی طرف تھکا دینے والے سفر جاری رکھے ہوئے ہیں۔

انہوں نے کہاکہ اس طرح یہ تنازعہ طوالت اختیار کرے گا جو عالمی امن وسلامتی کیلئے بڑا خطرہ ہے ۔

انہوں نے فرسودہ ، غیرمنصفانہ اورغیر شفاف عالمی مالیاتی نظام میں اصلاحات کا مطالبہ بھی دہرایا تاکہ اس سے تمام ملکوں کو فائدہ ہو اور حکومتوں پرزوردیا کہ وہ تعلیم ، صحت، غذائیت اور سماجی تحفظ کے نظاموں پرخرچ کریں۔