فواد چوہدری کا انتخابات کا بائیکاٹ، الیکشن کمیشن کو خط لکھ دیا

فواد چوہدری نے عام انتخابات 2024 کا بائیکاٹ کرتے ہوئے الیکشن کمیشن کو لکھ دیا۔

فواد چوہدری نے الیکشن کمیشن لکھے گئے خط میں کہا کہ انتخابات میں آئین کی خلاف ورزی کی جا رہی ہے۔الیکشن میں چناؤ ہی نہ ہو تو ایسے انتخابات کے کیا معانی ہیں؟

فواد چوہدری نے خط میں شکوہ کیا کہ میرے بھائی کاغذات نامزدگی جمع کرانے گئے تو انہیں گرفتار کر لیا گیا، مجھے گرفتار کیا گیا کہ میں الیکشن سے دستبردار ہوجاؤں، ہمارے کارکنوں کو ڈرایا دھمکایا گیا اور گرفتار کیا گیا، بلا جواز ہمارے کاغذات نامزدگی مسترد کئےگئے۔

فواد چوہدری نے خط میں لکھا کہ میرے بھائی کے کاغذات منظورہوئے، لیکن نیب نے انہیں میرے ساتھ شریک ملزم بنادیا۔  الیکشن کمیشن فرائض کی انجام دہی میں ناکام ہو گیا ہے، الیکشن کمیشن سے استعفے کا مطالبہ کرنا وقت کا ضیاع ہے۔

انہوں نے لکھا کہ میں خود تمام سختیاں برداشت کرنے کے لیے تیار ہوں، اپنے ووٹرز، دوستوں اور خاندان کو مزید مصیبت میں مبتلا کرنا مناسب نہیں۔ موجودہ حالات میں انتخابات کا بائیکاٹ کرتے ہیں۔

خیال رہے کہ فواد چوہدری قومی اسمبلی کے حلقہ این اے 60 اور 61 جہلم سے امیدوار تھے۔