پاک ایران کشیدگی کے خاتمے میں ترکی کا اہم کردار ہے ،مرتضٰی سولنگی

نگران وزیراطلاعات ونشریات مرتضٰی سولنگی  نے پاکستان اور ایران کے درمیان حالیہ کشیدگی کے خاتمے میں دوست ممالک خصوصا ترکیہ کے تعمیری کردار کو سراہا۔

انہوں نے کہا کہ ریاستی اداروں کے موثر اقدامات کی وجہ سے صورتحال بڑی حد تک معمول پر آگئی ہے تاہم دوست ممالک کا جذبہ خیر سگالی اور مسلسل رابطے بہت قابل تعریف ہیں۔

انہوں نے کہا کہ پاکستان کے لئے یہ ممکن نہیں تھا کہ وہ اس جارح اقدام کا جواب نہ دے اس لئے اس نے جواب دیا اور مناسب طریقے سے جواب دیا۔

نگران وزیر نے کہا کہ جوابی کارروائی سے پاکستانیوں کا ریاست او اسکے اداروں پر اعتماد میں اضافہ ہوا ہے ، انہوں نے کہا کہ ترک وزیرخارجہ ہاکان فیدان پاکستان اور ایران کے وزرائے خارجہ کے ساتھ قریبی رابطے میں رہے۔

انہوں نے کہا کہ پاکستان ابھی تک ترکیہ اور چین کے ساتھ رابطے میں ہے جو اس سلسلے میں اپنی کوششیں کررہے ہیں ۔ 

مرتضٰی سولنگی  نےکہا کہ پاکستان کی حکومت اور عوام کے ترکیہ کی حکومت اور عوام کے ساتھ تعلقات پاکستان کیلئے قیمتی اثاثہ ہیں۔