پاکستان میں عام انتخابات کی تیاری میں تیزی

آئندہ ماہ کی آٹھ تاریخ کو ہونے والے عام انتخابات 2024 کیلئے انتخابی سرگرمیوں میں تیزی آتی جا رہی ہے۔

سیاسی جماعتیں ووٹروں کی حمایت حاصل کرنے کیلئے جلسے کر رہی ہیں ، پاکستان مسلم لیگ ن آج راولپنڈی میں جلسہ عام کا انعقاد کر رہی ہے جس سے پارٹی کے صدر شہباز شریف خطاب کریں گے ۔ 

پاکستان پیپلز پارٹی کے سربراہ بلاول بھٹو زرداری آج پشاور میں عوامی اجتماع سے خطاب کریں گے ، اس کے علاوہ امیدوار ووٹروں کے ساتھ روابط کیلئے کارنر میٹنگز کر رہے ہیں۔

الیکشن کمیشن کے مطابق قومی اسمبلی کی نشستوں کیلئے کُل 5121 امیدوار مدِ مقابل ہوں گے جن میں 4807 مرد، تین سو بارہ خواتین اور دو ٹرانس جینڈر شامل ہیں۔

چاروں صوبائی اسمبلیوں کیلئے بارہ ہزار چھ سو پچانوے امیدوار میدان میں اتریں گے جس میں 12123،  مرد اور 570 خواتین اور دو ٹرانس جینڈرز بھی شامل ہیں۔

قومی اسمبلی کی 266 جنرل نشستوں اور چاروں صوبائی اسمبلیوں کی پانچ سو ترانوے نشستوں کیلئے انتخابات کرائے جائیں گے۔