سورج آج خانہ کعبہ کے اُوپر ہوگا

تفصیلات کے مطابق سورج سعودی وقت کے مطابق آج دوپہر 12 بجکر 18 منٹ پر خانہ کعبہ کے اوپر ہوگا، یہ اس سال  پہلی مرتبہ ہوگا۔ سورج عین اوپر آنے پر خانہ کعبہ کا سایہ ختم ہوجائے گا، قدیم زمانے کے لوگ اسی سادہ طریقے سے قبلے کا رخ متعین کیا کرتے تھے۔ سربراہ انجمن فلکیات کا کہنا ہے کہ  عرب ممالک، قطب شمالی کے پڑوسی علاقوں افریقہ اور یورپ کے باشندے اس موقع پر قبلے کی سمت متعین کرسکتے ہیں۔ چین، روس اور مشرقی ایشیا کے باشندے بھی قبلے کی سمت کا تعین کرسکتے ہیں۔

خیال رہے کہ سورج اپنی گردش کے دوران خط استوا سے مدار السرطان کی طرف مئی کے مہینے میں منتقل ہوتا ہے اور اس طرح گردش کرتے کرتے سورج خانہ کعبہ کے اوپر آجاتا ہے۔

واضح رہے کہ ہرسال دو مرتبہ سورج عین خانہ کعبہ کے اوپرآتا ہے،اس سے قبل سورج خانہ کعبہ کے اوپر سال میں پہلی بار 27 مئی اور دوسری بار 15 جولائی کو آتا ہے۔