وزیراعظم شہباز شریف نے کہا کہ مختلف شعبوں میں پاک چین مشترکہ منصوبے اور چینی صنعت کی منتقلی سے ملکی معیشت مزید مستحکم ہو گی۔

وزیراعظم شہبازشریف نے کہا ہے کہ پاکستان اور چین کے درمیان کان کنی اورمعدنیات ، انفارمیشن ٹیکنالوجی ، برآمدی اور صنعتی زونز اور چین سے صنعت کی منتقلی سمیت مختلف شعبوں میں مشترکہ منصوبوں سے پاکستان کی معیشت کومزید مضبوط بنانے میں مدد ملے گی۔

انہوں نے یہ بات آج اسلام آباد میں چین کے اعلیٰ سطح کے ایک وفد سے ملاقات میں کہی۔

شہبازشریف نے کہاکہ پاکستان اور چین کے درمیان بڑھتے ہوئے تعاون سے سرمایہ کاری، صنعت ، زراعت ، خصوصی اقتصادی زونز اور زرعی شعبوں سے متعلق دوطرفہ انتظامات کو مضبوط بنانے میں مدد ملے گی۔

انہوں نے کہاکہ پاکستان اپنی زرعی برآمدات کو چینی منڈی کی ضروریات کے مطابق مزید مسابقتی اور معیاری بنا کر بڑھا سکتا ہے۔

وزیراعظم نے وفد کو وفاقی کابینہ کی جانب سے چینی شہریوں کیلئے ویزہ فیس ختم کرنے کے فیصلے کے بارے میں بتایا جس کا اطلاق اس ماہ کی چودہ تاریخ سے ہوگا ۔انہوں نے چند ماہ قبل بشام میں چینی باشندوں کی ہلاکتوں پر افسوس کااظہار کرتے ہوئے پاکستان میں چینی شہریوں کومکمل سیکورٹی فراہم کرنے کی یقین دہانی کرائی۔

اسلام آباد ہائیکورٹ نے پی ٹی آئی رہنما شبلی فراز کا نام ایگزٹ کنٹرول لسٹ (ای سی ایل) سے نکالنے کا حکم دیدیا۔

اسلام آباد ہائی کورٹ کے جسٹس طارق محمود جہانگیری نے شبلی فراز کی بیرون ملک جانے پر پابندی سے متعلق درخواست پر سماعت کی، شبلی فراز اپنے وکیل کے ہمراہ عدالت پیش ہوئے۔

وکیل درخواست گزار کےدوران سماعت موقف اپنایا کہ شبلی فراز پر 4 ایف آئی آرز ہیں اور وہ سب میں ضمانت پر ہیں۔جسٹس طارق محمود جہانگیری نے سرکاری وکیل سے استفسار کیا کہ اب کیا گراؤنڈ ہے؟جس پر سرکاری وکیل نے جواب دیا کہ جو عدالت حکم کرے گی ہم عمل کریں گے۔

اسلام آباد ہائی کورٹ کے جسٹس طارق محمود جہانگیری نے ریمارکس دیئے کہ وزارت داخلہ اور ڈی جی پاسپورٹس عدالت کو مطمئن نہیں کرسکے، ایک ہفتے میں شبلی فراز کا نام ای سی ایل سے نکال کر عدالت میں رپورٹ پیش کی جائے۔

عدالت نے حکم دیا کہ ڈی جی پاسپورٹ اور ڈی جی ایف آئی اے عملدرآمد رپورٹ پیش کریں۔

اسلام آباد: حماس کے سربراہ اسماعیل ہانیہ کی حالیہ شہادت پر پاکستان بھر میں آج یوم سوگ منایا جا رہا ہے۔ اس موقع پر ملک بھر میں نماز جمعہ کے بعد اسماعیل ہانیہ کی غائبانہ نماز جنازہ ادا کی جائے گی۔

گزشتہ روز وزیراعظم شہباز شریف کی زیر صدارت فلسطین میں اسرائیل کے ظلم و ستم پر ایک اہم مشاورتی اجلاس منعقد ہوا۔ اجلاس میں نہتے فلسطینیوں پر اسرائیل کے بڑھتے ہوئے مظالم کے حوالے سے گہرے افسوس اور غم و غصے کا اظہار کیا گیا۔ شرکاء نے 9 ماہ سے جاری اسرائیلی ظلم کی شدید مذمت کی اور اس صورتحال پر تشویش کا اظہار کیا۔

وزیراعظم شہباز شریف نے فلسطین میں جاری اسرائیلی ظلم کو امت مسلمہ کے لیے ایک المیہ قرار دیا اور اجلاس میں مطالبہ کیا کہ نہتے فلسطینیوں کو فوری انسانی ہمدردی کی بنیاد پر امداد فراہم کی جائے۔

اجلاس میں فیصلہ کیا گیا کہ آج نماز جمعہ کے بعد پورے ملک میں اسماعیل ہانیہ کی غائبانہ نماز جنازہ ادا کی جائے گی۔ اس کے علاوہ، پارلیمنٹ میں فلسطین کے ساتھ مکمل یکجہتی کے اظہار کے لیے ایک خصوصی قرارداد بھی پیش کی جائے گی۔

اجلاس میں مسلم لیگ ن، پیپلز پارٹی، بلوچستان عوامی پارٹی، متحدہ قومی موومنٹ، استحکام پاکستان پارٹی، مسلم لیگ ق، مسلم لیگ ضیاء، نیشنل پارٹی کے سربراہان و سینئر نمائندے شریک ہوئے۔ شرکاء نے اسرائیلی مظالم کی پرزور مذمت کرتے ہوئے نہتے فلسطینی بہن بھائیوں کے ساتھ مکمل اظہارِ یکجہتی کیا۔

اجلاس میں شرکاء نے اس واقعے کو فلسطینیوں پر جاری ظلم بند کرنے اور خطے میں امن کی کوششوں کو سبوتاژ کرنے کی دانستہ سازش قرار دیا۔ انہوں نے کہا کہ ایسے واقعات عالمی امن کو تباہ کرنے اور خطے میں مزید کشیدگی کی فضا کو ہوا دیتے ہیں۔