مولانا فضل الرحمان کا 26مارچ کو لانگ مارچ کا اعلان

میڈیا سے گفتگو کرتے ہوئے پی ڈی ایم سربراہ  مولانا فضل الرحمان کا کہنا تھا کہ آج پی ڈی ایم کا سربراہی اجلاس ہوا، پی ڈی ایم کے تمام سربراہان نے اجلاس میں شرکت کی،نواز شریف اور آصف زرداری ویڈیو لنک کے ذریعے شریک ہوئے،پی ڈی ایم نے 26 مارچ کو لانگ مارچ کا فیصلہ کیا ہے جبکہ سینیٹ میں ہم آپس میں مقابلہ نہیں کریں گے،الیکشنز میں ہمارے کینڈیٹ مشترکہ ہونگے، پی ٹی آئی کے ارکان اپنے لوگوں کو ووٹ دینے کے حق میں نہیں۔

ان کا مزیدکہنا تھا کہ مہنگائی نے عوام کی زندگی کو اجیرن بنادیا ہے،پی ڈی ایم عوام کی آواز بنے کی اور مہنگائی کے خاتمے کیلئے آواز بلند کریں گے،عوام کو مشکلات سے نکالنے کیلئے ہر قربانی دینے کو تیار رہیں گے،23اکاؤنٹس میں سے پی ٹی آئی 18اکاؤنٹس کو چھپا رہی،عمران خان اب صادق اور امین نہیں رہا کیوں کہ وہ اکاؤنٹس کی تفصیلات دینے میں بہانے کررہا،ٹرانسپیرنسی ایجنسی نے اس حکومت کی کرپشن کی داستان بتادی،ٹرانسپیرنسی رپورٹ نے آج عمران خان حکومت کو چور قرار دیدیا ہے،عمران خان آج سے سرٹیفائیڈ چور ہے۔

مولانا فضل الرحمان نے مزید کہا کہ جسٹس عظمت سعید کی نگرانی میں بنائے گئے کمیشن کو پی ڈی ایم مسترد کرتا ہے جبکہ قومی اسمبلی اور سینیٹ میں سپیکرکے رویوں کیخلاف ایوان احتجاج جاری رہے گا۔

انہوں نے مزید کہا کہ عمران خان ترقیاتی فنڈز کو رشوت قرار دیتے تھے،آج ترقیاتی فنڈز جس انداز سے تقسیم کیے جارہے اس پر عمران خان خود تنقید کرتا تھا،آج سپریم کورٹ کے ججز نے بھی اس چیز کا نوٹس لیا،ہماری لڑائی غیر جمہوری عمل کیخلاف ہے،ہمارا مقصد ناجائز اور نااہل حکومت سے جان چھڑوانا ہے۔