حکومت کا مزید 1 ارب ڈالر کی کورونا ویکسین خریدنے کا فیصلہ

تفصیلات کے مطابق   کابینہ کی اقتصادی رابطہ کمیٹی کا اجلاس کل طلب کر لیا گیا ہے، شوکت ترین کی زیر صدارت ای سی سی 20 نکاتی ایجنڈے کا جائزہ لے گی۔

ذرائع کے مطابق  کم ترقی یافتہ علاقوں کے طلباء کی فیس ادائیگی کیلئے گرانٹ کی منظوری کا امکان ہے،جبکہ ایچ ای سی، رینجرز، آڈیٹر جنرل سمیت مختلف محکموں کیلئے گرانٹس کی منظوری بھی متوقع ہے۔احساس کوئی بھوکا نہ سوئے فنڈ کے قیام کی سمری ایجنڈے میں شامل ہے۔

حکومت نے مزید 1 ارب ڈالر کی کورونا ویکسین خریدنے کا فیصلہ کرلیا ہے۔وفاقی وزیر اسد عمر کا کہنا ہے کہ  سمری کل منظوری کیلئے اقتصادی رابطہ کمیٹی کے اجلاس میں پیش کی جائے گی،اب تک 25 کروڑ ڈالر مالیت کی ویکسین خرید چکے ہیں، معیشت کو بندشوں سے نکالنے کیلئے عوام کی ویکسین ضروری ہے۔ ہسپتالوں کی اپ گریڈیشن سمیت اس سال کورونا پر 51 ارب روپے خرچ کیئے گئے ہیں ۔