اڈیالہ جیل سے عمران خان کے سیل کی تصاویر جاری، پی ٹی آئی کے اعتراضات

اڈیالہ جیل سے بانی پی ٹی آئی عمران خان کے سیل کی تصاویر جاری کردی گئیں ۔ 

 حکومت کی جانب سے جاری کردہ تصاویر میں بانی پی ٹی آئی عمران خان کو جیل میں دی گئی سہولیات دکھائی گئیں۔ 

تفصیلات کے مطابق عدالت کے سامنے بانی پی ٹی  آئی نے مؤقف اپنایا  تھا کہ جیل میں ان کو سہولیات فراہم نہیں کی جا رہی ہیں ،  جس پر  وفاقی حکومت نے اڈیالہ جیل میں عمران خان کے سیل کی اندرونی تصاویر جاری کر دیں۔ 
حالیہ جاری کردہ تصاویر میں یہ دیکھا جا سکتا ہے کہ عمران خان کو ان کے سیل میں ایک میٹریس، ایک ائیر کولر، ایک ایل ای ڈی اور ڈرائی فروٹس سمیت بیٹھنے کے لیے کرسی اور اسٹڈی ٹیبل دی گئی ہے۔ 
اس کے ساتھ ہی حکومت نے اس راہداری کی تصاویر بھی جاری کر دیں جو چیئر مین پی ٹی آئی کو چہل قدمی کے لیے دی گئی ہے۔ 
حکومت نے یہ تمام تصاویر بطور دستاویزات عدالت میں جمع کروادیں۔ حکومت نے مؤقف اپنایا کہ اگر عدالت چاہے تو سہولیات کی فراہمی کے حوالے سے بانی پی ٹی آئی کے بیان کی روشنی میں کمیشن بھی قائم کر سکتی ہے، تاکہ فراہم کردہ سہولیات کی جانچ پڑتال کی جاسکے۔ 
دوسری جانب پی ٹی آئی نے ان سہولیات کو ناکافی قرار دیا۔ پی ٹی آئی کے آفیشل ایکس اکاؤنٹ سے ٹویٹ میں لکھا گیا کہ یہ وہ چھوٹا سا کمرہ ہے جسے حکومتی ارکان وی آئی پی گردانتے ہیں۔ 
پی ٹی آئی فالورز  نے لکھا کہ یہ وہ کوٹھڑی ہے جہاں  شاہانہ زندگی ترک کر کے ملک کی خاطر جدوجہد کرنے اور وطن عزیز کا نام روشن کرنے والے  ملک کے  مقبول ترین لیڈر کر رکھا گیا ہے۔ 
پی ٹی آئی کی جانب سے یہ بھی مؤقف اختیار کیا گیا کہ اس سے قبل گرفتار سیاسی لیڈران کو جیلوں میں بھی فائیو اسٹار ہوٹلوں جیسی سہولیات دی گئیں،  جبکہ بانی پی ٹی آئی کو محض چھوٹا سا کمرہ دیا گیا ہے۔