پی ٹی آئی کا جلسے کی این او سی منسوخ کرنے پر عدالت سے رجوع

پاکستان تحریک انصاف نے اسلام آباد میں جلسے کے این او سی منسوخ کرنے پر عدالت سے رجوع کر لیا۔

پی ٹی آئی کی جانب سے اسلام آباد ہائیکورٹ میں ضلعی انتظامیہ کی جانب سے این او سی منسوخ کرنے پر توہین عدالت کی درخواست دائر کی گئی ہے۔

اپوزیشن لیڈر عمر ایوب، بیرسٹر گوہر، عمیر نیازی، شہریار آفریدی، ثناء اللہ مستی خیل اور شاہد خٹک کی جانب سے اسلام آباد ہائیکورٹ میں درخواست دائر کی گئی۔

درخواست میں موقف اپنایا گیا کہ ترنول جلسے کا این او سی معطل کرنا توہین عدالت ہے۔

درخواست میں استدعا کی گئی کہ جلسہ کرنے کی اجازت دینے کے احکامات جاری اور فریقین کو عدالتی احکامات پر عملدرآمد کرنے کا حکم دیا جائے، پی ٹی آئی کارکنوں کو ہراساں کرنے سے روکنے کے احکامات بھی جاری کئے جائیں۔

یاد رہے کہ اسلام آباد کی انتظامیہ کی جانب سے تحریک انصاف کے جلسے کے این او سی کی منسوخی پر پی ٹی آئی نے عدالت جانے کا فیصلہ کیا تھا۔