کراچی: اورنگی ٹاؤن میں گیس سلنڈر کے دھماکے سے 8 افراد جھلس گئے

کراچی: کراچی کے علاقے اورنگی ٹاؤن میں غوثیہ چوک کے قریب ایک گھر میں گیس سلنڈر پھٹنے سے شدید دھماکا ہوا۔ دھماکے کے نتیجے میں گھر میں موجود 8 افراد جھلس گئے جبکہ دیوار گرنے سے ہمسائیوں کی چھت بھی زمین بوس ہو گئی ہے۔

ذرائع کے مطابق، گیس سلنڈر کے دھماکے سے متاثرہ گھر کی دیوار گر گئی، جس سے ہمسائیوں کے گھر کو بھی شدید نقصان پہنچا ہے۔ ملبے تلے دب کر 4 افراد زخمی ہوئے ہیں۔ تمام زخمیوں کو فوری طور پر سول ہسپتال کے برنز وارڈ میں منتقل کر دیا گیا ہے، جہاں انہیں طبی امداد فراہم کی جا رہی ہے۔

ریسکیو حکام کے مطابق، دھماکے سے جھلسنے والوں میں 4 خواتین، ایک بچہ اور 3 مرد شامل ہیں۔ ان میں سے 3 زخمیوں کی حالت تشویشناک بتائی جاتی ہے۔

متاثرہ خاندان نے بتایا کہ گزشتہ دو سال سے گھر میں گیس فراہم نہیں کی جا رہی تھی، جس کی وجہ سے انہیں گیس سلنڈر استعمال کرنا پڑا۔ دھماکے کے بعد، متاثرہ گھر کی دیوار گرنے کے باعث پڑوسی کے گھر کو بھی شدید نقصان پہنچا ہے۔