روس نے پاکستان سٹیل ملز کی بحالی کیلئے مدد کی پیشکش کر دی

کراچی: کراچی کونسل آن فارن ریلیشنز میں پاک-روس تعلقات پر منعقدہ ایک تقریب میں روسی قونصل جنرل وکٹرووچ نے شرکت کی۔ انہوں نے کہا کہ روس ہمیشہ جنوبی ایشیا میں امن کو فروغ دیتا رہا ہے اور پاکستان سٹیل ملز دونوں ممالک کے تعاون کی ایک بہترین مثال ہے۔

روسی قونصل جنرل نے مزید کہا کہ پاکستان پہلا ملک ہے جس کے ساتھ روس نے ڈپلومیٹک ویزا پر تعاون کیا ہے۔ گزشتہ کئی سالوں میں پاکستان میں مختلف حکومتیں آئیں لیکن روس کے ساتھ سفارتی تعلقات میں کوئی تبدیلی نہیں آئی۔

انہوں نے بتایا کہ پاکستان اور روس کے سربراہان نے متعدد شعبوں میں تعاون پر بات چیت کی ہے اور روس پاکستان کو فوڈ سکیورٹی میں تعاون کرنے کے لیے بھی پیش پیش ہے۔ حال ہی میں دونوں ممالک کے درمیان متعدد پروجیکٹس پر کام شروع ہوا ہے۔

میڈیا رپورٹ کے مطابق روسی قونصل جنرل نے یہ بھی کہا کہ وہ پاکستان سٹیل مل کی بحالی میں مدد کرنے کے لیے تیار ہیں۔ انہوں نے حکومت اور انتظامیہ سے اس حوالے سے سنجیدگی سے کام کرنے کی اپیل کی۔

Urdu24