پاکستان میں مہنگائی آسمان کو چھو رہی ہے: بلوم برگ

اسلام آباد: بلوم برگ کی ایک تازہ رپورٹ میں پاکستان میں مہنگائی کی صورتحال پر تشویش ناک انکشافات سامنے آئے ہیں۔ رپورٹ کے مطابق پاکستان میں مہنگائی کی شرح ایشیائی ممالک میں سب سے زیادہ ہے۔

رپورٹ میں بتایا گیا ہے کہ جولائی میں بجلی کی قیمتوں میں 18 فیصد کا اضافہ ہوا ہے جس کی وجہ سے گھروں کے بجلی کے بل گھروں کے کرائے سے بھی زیادہ ہو گئے ہیں۔ 2021 سے لے کر اب تک بجلی کی قیمتوں میں 155 فیصد کا اضافہ ہو چکا ہے۔ مہنگے بجلی کے بل عوام کے لیے ایک بڑا مسئلہ بن چکے ہیں۔

بلوم برگ کی رپورٹ کے مطابق یہ اضافہ آئی ایم ایف پروگرام کے تحت کیا گیا ہے۔ پاکستان میں مہنگائی کی مجموعی شرح بھی 12 فیصد تک پہنچ چکی ہے۔

شہریوں، کاروباری اور حزب اختلاف کی سیاسی جماعتوں کے احتجاج ملک بھر میں پھیل چکے ہیں جس سے وزیر اعظم شہباز شریف نے بجلی کے غریب ترین صارفین کو قیمتوں میں اضافے کے دھچکے سے بچانے کے لیے اگلے تین ماہ کے دوران 5000 کروڑ روپے ($180 ملین) سبسڈی دینے کا اعلان کیا ہے۔