موسم گرما کی تعطیلات ختم، پنجاب اور سندھ میں سکول دوبارہ کھل گئے

لاہور، کراچی:موسم گرما کی تعطیلات کا دور ختم ہو گیا ہے اور آج سے پنجاب اور سندھ کے تمام سرکاری و نجی سکول دوبارہ کھل گئے ہیں۔ طلباء اور اساتذہ نے نئی اُمیدوں کے ساتھ نئے تعلیمی سال کا آغاز کیا ہے۔

پنجاب میں سرکاری سکول ہفتے میں 5 روز کھلیں گے۔ مرد اساتذہ صبح 8 بجے سے دوپہر 3 بجے تک اور خواتین اساتذہ صبح 8 بجے سے ڈھائی بجے تک سکول میں موجود رہیں گے۔ ڈبل شفٹ والے سکولوں میں پہلی شفٹ صبح 8 بجے سے دوپہر ڈھائی بجے تک اور دوسری شفٹ دوپہر 1 بجے سے شام 5 بجے تک ہوگی۔ جمعے کو سکول صبح 8 بجے سے دوپہر ساڑھے 12 بجے تک کھلے رہیں گے۔

سندھ میں بھی تعلیمی ادارے آج سے کھل گئے ہیں۔ وزیر تعلیم سید سردار علی شاہ نے کہا ہے کہ سندھ میں پہلی بار اساتذہ لائسنس پالیسی اور دیگر اصلاحات متعارف کرائی گئی ہیں۔ صوبے میں تعلیمی اصلاحات کے سلسلے کو جاری رکھا جائے گا۔

سکولز کھلتے ہی طلباء اور والدین میں خوشی کی لہر دوڑ گئی ہے۔ اساتذہ نے چھٹیوں کے بعد پہلے دن آنے پر مختلف سرگرمیوں سے بچوں کی حوصلہ افزائی کی۔ تاہم، پہلے روز حاضری معمول سے کم رہی۔

محکمہ تعلیم کے مطابق سندھ میں موسم گرما کی تعطیلات کے بعد یکم اگست سے سکول دوبارہ کھلنے تھے لیکن گرمی کی شدت اور برسات کے امکان کے باعث موسم گرما کی تعطیلات 14 اگست تک بڑھا دی گئی تھیں۔