تائیوان میں 6.3 شدت کا خوفناک زلزلہ 

تائی پے: تائیوان ایک بار پھر زلزلے کی زد میں آ گیا ہے۔ جمعہ کو صبح سویرے تائیوان کے مشرقی شہر ہوالین سے 34 کلومیٹر دور 6.3 شدت کا زلزلہ آیا۔ اس زلزلے نے دارالحکومت تائی پے سمیت پورے جزیرے کو ہلا کر رکھ دیا۔

حکام کے مطابق زلزلے کی گہرائی 9.7 کلومیٹر تھی۔ اس سے قبل جمعرات کو دیر گئے تائیوان کے شمال مشرقی ساحل پر 5.7 شدت کا زلزلہ بھی آ چکا تھا۔

حکام نے خبردار کیا ہے کہ اگلے چند دنوں میں 5.5 کی شدت تک آفٹر شاکس آنے کا خطرہ ہے۔ آج کے بڑے زلزلے کے بعد سے ہوالین کے قریب ایک درجن کے قریب زلزلے ریکارڈ کیے جا چکے ہیں۔

زلزلے کی وجہ سے عمارتوں میں دراڑیں پڑنے اور سامان گرنے کی خبریں بھی سامنے آ رہی ہیں۔ تاہم، ابھی تک کسی جانی نقصان کی اطلاع نہیں ملی ہے۔

حکام نے بارش کے بعد پہاڑی علاقوں میں لینڈ سلائیڈنگ کے خطرے سے بھی خبردار کیا ہے۔