کوئٹہ میں دستی بم حملے کے نتیجے میں پولیس اہلکار سمیت3 افراد زخمی

بلوچستان کے دارالحکومت کوئٹہ کے سریاب روڈ پر یونیورسٹی کے قریب دستی بم حملے کے نتیجے میں پولیس اہلکار سمیت3 افراد زخمی ہو گئے۔

بلوچستان پولیس کے مطابق دھماکے کی شدت کے باعث 2 گاڑیوں کے شیشے ٹوٹ گئے، پولیس کا کہنا ہے کہ زخمیوں کو طبی امداد کی فراہمی کے لیے ہسپتال منتقل کیا جا رہا ہے۔

میڈیا رپورٹس کے مطابق جائے وقوع سے تاحال کسی جانی نقصان کی خبر موصول نہیں ہوئی ہے جب کہ قانون نافذ کرنے والے اداروں کو دھماکے کے مقام کو گھیرے میں لے کر مزید تحقیقات کا آغاز کردیا ہے۔

یاد رہے 13 اگست کو بھی کوئٹہ کے لیاقت بازار میں دستی بم حملے کے نتیجے میں ایک شخص جاں بحق اور 6 افراد زخمی ہوگئے تھے۔

اس سے قبل 13اگست کو ہی کوئٹہ میں سریاب کے علاقے منیر مینگل روڈ پر گرلز اسکول میں دھماکا ہوا تھا، دھماکا نواب غوث بخش گرلز ہائی اسکول کے اندر ہوا، اسکول ٹائمنگ نہ ہونے کے باعث واقعے میں کوئی جانی نقصان نہیں ہوا۔