کمپنیوں کی نجکاری کیلئے حکومت اقدامات کر رہی ہے ، وزیر اطلاعات

اطلاعات ونشریات کے وزیرعطاء اللہ تارڑ نے کہا ہے کہ بجلی کی ترسیلی کمپنیوں کی نجکاری اور بجلی چوری کی روک تھام کیلئے اقدامات کئے جارہے ہیں۔

انہوں نے آج اسلام آباد میں صحافیوں سے گفتگو کرتے ہوئے کہا کہ عوام کو ریلیف فراہم کرنا بالخصوص بجلی بلوں میں کمی کرنا مسلم لیگ ن کی قیادت کی اولین ترجیح ہے۔

انہوں نے کہاکہ وفاقی حکومت نے ملک بھر میں دوسو یونٹ تک بجلی استعمال کرنے والے صارفین کو پچاس ارب روپے کی اعانت دی ہے انہوں نے واضح کیا کہ یہ رقم ترقیاتی بجٹ سے نکال کر بجلی بلوں میں ریلیف کیلئے دی گئی۔

وفاقی وزیر نے کہاکہ پنجاب حکومت نے اب دوسو ایک سے پانچ سو یونٹس کے درمیان یونٹس استعمال کرنے والے بجلی صارفین کو سبسڈی فراہم کرنے کیلئے اپنے ترقیاتی فنڈز سے 45ارب روپے مختص کئے ہیں۔

انہوں نے کہا کہ ان اقدامات کو سراہا جانا چاہیے اور تنقید کی بجائے دوسروں کو بھی اس پر عمل کرنا چاہیے، عطااللہ تارڑ نے کہا کہ حکومت موجودہ حالات میں جو کرسکتی ہے وہ کررہی ہے۔

انہوں نے کہا کہ مہنگائی کی شرح 23فیصد سے کم ہو کر 11فیصد ہوگئی ہے۔

واضح رہے کہ وزیراطلاعات نے کہا کہ بجلی کی قیمتوں میں مستقل کمی کیلئے اقدامات کئے جارہے ہیں۔