مسیحی برادری کی موجیں، صوبائی حکومت نےکرسمس پر اضافی چھٹی کا اعلان کر دیا

کراچی: حکومت سندھ نے 25 دسمبر کے ساتھ ساتھ کرسمس کے موقع پر مسیحی سرکاری ملازمین  کے لیے 26 دسمبر کو بھی عام تعطیل کا اعلان کردیا۔

تفصیلات کے مطابق محکمہ سروسز، جنرل ایڈمنسٹریشن اینڈ کوآرڈینیشن کی جانب سے جاری نوٹیفکیشن میں کہا گیا ہے کہ حکومت سندھ نے کرسمس کے موقع پر صرف مسیحی برادری کے لیے 26 دسمبر 2025 کو بھی عام تعطیل کا اعلان کیا ہے۔

نوٹیفکیشن میں کہا گیا ہے کہ تمام سرکاری، خودمختار اور نیم سرکاری ادارے، کارپوریشنز اور لوکل کونسل، جو حکومت سندھ کے زیرانتظام ہیں، میں چھٹی ہوگی تاہم انتہائی اہم خدمات سے وابستہ افراد اس میں شامل نہیں ہوں گے۔

حکومت سندھ نے 25 دسمبر کو بانی پاکستان قائد اعظم محمد علی جناح کے یومِ پیدائش اور کرسمس کے موقع پر بھی عام تعطیل کا باضابطہ نوٹیفکیشن جاری کر دیا۔ جس کا اطلاق تمام سرکاری، نیم سرکاری اداروں، سندھ حکومت کے ماتحت کارپوریشنز اور لوکل کونسلز پر ہو گا۔

نوٹیفکیشن کے مطابق 26 دسمبر کو سندھ حکومت کے زیرانتظام تمام سرکاری، خودمختار اور نیم سرکاری ادارے، کارپوریشنز اور لوکل کونسلز بند رہیں گی۔ تاہم انتہائی ضروری خدمات سے وابستہ عملہ تعطیل سے مستثنیٰ ہو گا۔

اعلامیے کے مطابق ان تعطیلات کا مقصد مذہبی ہم آہنگی کو فروغ دینا اور اقلیتی برادری کو اپنے مذہبی تہوار آزادی سے منانے کا موقع فراہم کرنا ہے۔