اے این ایف کی بڑی کارروائی: کروڑوں مالیت کی منشیات برآمد،15 ملزمان گرفتار

اسلام آباد : پاکستان میں منشیات کے خلاف جنگ میں اہم کامیابی حاصل کرتے ہوئے اینٹی نارکوٹکس فورس (اے این ایف) نے ملک کے مختلف شہروں میں کی گئی 10 مختلف کارروائیوں کے دوران 70 کروڑ روپے مالیت کی 37 کلو سے زائد مختلف اقسام کی منشیات برآمد کی ہیں اور اس سلسلے میں 15 ملزمان کو گرفتار کیا ہے۔

اے این ایف کے ترجمان کے مطابق اسلام آباد، پشاور، کراچی اور لاہور ایئرپورٹس پر مختلف مسافروں سے مختلف اقسام کی منشیات برآمد کی گئی ہیں جن میں ہیروئن، آئس، چرس اور نشہ آور گولیاں شامل ہیں۔ اس کے علاوہ جی ٹی روڈ نوشہرہ، ایم ون اسلام آباد اور کوئٹہ میں بھی منشیات کے کاروبار میں ملوث افراد کو گرفتار کرکے ان کے پاس سے بڑی مقدار میں منشیات برآمد کی گئی ہیں۔

گرفتار تمام ملزمان کے خلاف انسداد منشیات ایکٹ کے تحت مقدمات درج کر لیے گئے ہیں اور ان سے تفتیش جاری ہے۔

اے این ایف کی یہ کارروائی منشیات کے خلاف جاری جنگ میں ایک بڑی کامیابی ہے۔