ملک بھر میں موسلادھار بارشیں، نشیبی علاقے زیر آب

لاہور/اسلام آباد/کراچی : ملک کے مختلف حصوں میں موسلادھار بارشوں سے سیلاب کا خطرہ پیدا ہو گیا ہے۔ لاہور، اسلام آباد، راولپنڈی، بلوچستان اور آزاد کشمیر میں شدید بارشوں کے باعث نشیبی علاقے زیر آب آ گئے ہیں اور معمول زندگی بری طرح متاثر ہوئی ہے۔

لاہور میں رات گئے ہونے والی بارش نے نشیبی علاقے پانی سے بھر دیئے۔لکشمی چوک، مال روڈ، جیل روڈ، باغبانپورہ، تاج پورہ، اقبال ٹاؤن اور چوبرجی سمیت مختلف علاقوں میں پانی جمع ہو جانے کی وجہ سے لوگوں کو شدید مشکلات کا سامنا ہے۔

اسلام آباد اور راولپنڈی میں بھی بارشوں نے معمول زندگی کو متاثر کیا ہے۔ نشیبی علاقے زیر آب آ گئے ہیں اور گلی محلوں اور سڑکوں پر پانی جمع ہو گیا ہے۔ سندھ میں بھی بارشوں کا سلسلہ جاری ہے اور کراچی میں وقفے وقفے سے بارش ہو رہی ہے۔

بلوچستان میں مون سون بارشوں نے تباہی مچا دی ہے۔ خضدار میں گرج چمک کے ساتھ تیز بارش سے ندی نالوں میں طغیانی آگئی ہے اور کچے کے علاقوں میں سیلابی صورتحال برقرار ہے۔

آزاد کشمیر میں بھمبر اور کوٹلی میں موسلادھار بارش سے ندی نالوں میں طغیانی آگئی ہے اور ملحقہ آبادیوں کو محتاط رہنے کی ہدایت کی گئی ہے۔

اس صورتحال کے پیش نظر حکام نے متاثرہ علاقوں میں امدادی کام شروع کر دیے ہیں۔ ریسکیو اہلکاروں کو پانی نکالنے اور متاثرین کی مدد کے لیے تعینات کیا گیا ہے۔

محکمہ موسمیات نے آئندہ چند دنوں میں بھی بارشوں کا سلسلہ جاری رہنے کی پیش گوئی کی ہے۔