فلسطینی صدر محمود عباس کی سعودی ولی عہد محمد بن سلمان سے ملاقات

سعودی ولی عہد محمد بن سلمان سے فلسطینی صدر محمود عباس نے ریاض میں ملاقات کی ہے۔دونوں رہنماؤں کے درمیان ملاقات میں غزہ کی صورتحال سمیت فوجی کشیدگی کم کرنے پر تبادلہ خیال کیا گیا۔ 

عرب میڈیا کے مطابق ملاقات میں گفتگو کرتے ہوئے سعودی ولی عہد محمد بن سلمان نے کہا کہ سعودی عرب اپنے فلسطینی بھائیوں کے ساتھ کھڑا ہے۔انہوں نے کہا کہ سعودی عرب فلسطینی عوام کی اپنے حقوق کےحصول تک حمایت جاری رکھے گا۔

سعودی ولی عہد محمد بن سلمان کا کہنا تھا کہ سعودی عرب غزہ اور دیگر علاقوں میں کشیدگی ختم کرانے کے لیے بین الاقوامی اور علاقائی فریقین سے رابطے میں ہے۔

اس موقع پر فلسطینی صدر محمود عباس نے شہزادہ محمد بن سلمان کی کوششوں کو سراہا۔ ملاقات میںسعودی وزیر دفاع پرنس خالد بن سلمان ، وزیر خارجہ شہزادہ فیصل بن فرحان، انٹیلی جنس چیف،اردن میں سعودی سفیر سمیت فلسطینی اعلیٰ حکام نے بھی شرکت کی۔