تاجر مجھ سے شکایت کریں ،چغلی لگانے کی ضرورت نہیں،بلاول بھٹو

چیئرمین پیپلزپارٹی بلاول بھٹو کاکہنا ہے کہ سندھ میں پیپلز پارٹی کی حکومت ہے، تاجرشکایت پرمجھ سے بات کریں۔کہیں چغلی لگانے کی ضرورت نہیں۔
کراچی میں تاجروں کے اعزاز میں تقریب سے خطاب کرتے ہوئے بلاول بھٹو نے کہا کہ کراچی کے تاجروں سے بھتہ وصولی کا خاتمہ ہوگیا، تو یہ کریڈٹ سندھ حکومت اور وزیراعلیٰ مراد علی شاہ کا ہے، آج آپ سے بھتہ لیا جاتا ہے نہ جان سے مارنے کی دھمکیاں دی جاتی ہیں۔
بلاول بھٹو نے کہا کہ زمینوں پر قبضے کی شکایات بار بار آرہی ہیں،سندھ میں پیپلز پارٹی کی حکومت ہے، کہیں چغلی لگانے کی ضرورت نہیں، مجھ سے کہہ دیں، کوشش کریں گےکہ تاجروں کےمسائل حل کریں، ہم مسائل کی موجودگی کا اعتراف کرتے ہیں اورقبول کرتےہیں کہ کئی مسائل حل طلب ہیں۔

بلاول بھٹو نے کہا کہ پیپلز پارٹی کے نمائندے ہمارے منشور کی بنیاد پر انتخابات میں کامیابی حاصل کرتے ہیں، ہم چاہتے ہیں کہ سندھ میں پبلک پرائیویٹ پارٹنرشپ  کو مضبوط بنائیں، اور اس شراکت داری کے ذریعے بڑے منصوبے مکمل کریں، ہم نے ماضی میں صحت، تھرکول اور تعمیراتی شعبے کے منصوبے پی پی پی موڈ پر ہی مکمل کیے ہیں۔

چیئرمین پیپلزپارٹی نے کہا کہ اگر آج آپ کی فیکٹریاں اور صنعتیں چل رہی ہیں، اور بھتہ نہیں لیا جاتا،مزدوروں کو ہڑتال کیلئےزبردستی نہیں لےجایا جاتا، اور سب امن و سکون سے کارروبار کررہےہیں، تو اس میں چھوٹا سا کردارپیپلز پارٹی کا بھی ہے۔
سابق وزیر خارجہ نےکہا کہ میں نے کبھی بھی کسی تاجر سےچندہ مانگا ہے نہ بھتہ مانگا ہے، میرا سیدھا سا مدعاہے، میرےبارے میں کوئی شکایت ہے تو سیدھی طرح بتائیں، میں کیوں چاہوں گا کہ میرےنام پر یا ہماری حکومت کے نام پر لوگ آپ کو تنگ کریں، جو بھی مسئلہ ہو، آپ کھل کر بتائیں، نام لیں کہ فلاں افسر یا شخص آیا اور اس نے یہ مطالبہ کیا۔

بلاول بھٹو نے کہا کہ ہم چاہتے ہیں کہ نجی شعبے کی مدد سے سندھ کی ڈسکوز بنائیں، ہم نے اپنا بندوبست خود کرنا ہے،وزیر اور وزیراعظم کس ڈھٹائی سے کہہ دیتے ہیں کہ بجلی کی لوڈشیڈنگ ختم کر دی؟، سندھ اور وفاق میں بھی مسائل ہیں، یہ کیسی حکومت ہے جو آئینی حق نہیں دیتی، ہمیں گیس نہیں ملتا، یہ ہمارا آئینی حق ہے، ہمارا مطالبہ ہے کہ ہمیں گیس دو۔

چیئرمین پیپلزپارٹی کہا کہ ہم فخر کرتے ہیں کہ سندھ واحد صوبہ ہے جس میں پبلک پرائیوٹ پارٹنرشپ چل رہی ہے، بلکہ عالمی سطح پر بھی اسے سراہا گیا ہے، سندھ حکومت کےپبلک پرائیوٹ پارٹنرشپ کےمنصوبےمنافع میں ہیں، یہ تمام منصوبے اپنی لاگت مکمل کرنےکےبعد اب منافع بنا رہےہیں، ہم چاہتے ہیں نجی شعبے کے ساتھ مل کر سندھ کے عوام کی خدمت کریں۔