حکومت بجلی کی قیمتیں کم کرنے اورگردشی قرض ختم کرنے کے لئے اقدامات کررہی ہے ، اویس لغاری

وزیر توانائی سردار اویس احمد خان لغاری نے کہا ہے کہ حکومت بجلی کی قیمتیں کم کرنے اورگردشی قرض ختم کرنے کے لئے اقدامات کررہی ہے۔

انہوں نے یہ بات اسلام آباد میں پاکستان بزنس کونسل کے معیشت پر مکالمے میں گفتگو کرتے ہوئے کہی۔

وزیر توانائی نے کہا کہ حکومت تمام نجی بجلی کمپنیوں کے ساتھ نظرثانی شدہ سمجھوتوں پر بھی کام کررہی ہے کیونکہ بجلی کی قیمتوں کا موجودہ نظام جاری نہیں رہ سکتا۔

انہوں نے کہا کہ اگلے مرحلے میں حکومت نجی بجلی کمپنیوں کے ساتھ نظرثانی شدہ سمجھوتوں پر دستخط کرے گی اور اس سلسلے میں سروس لیول سمجھوتے تیار کرلئے گئے ہیں۔

اویس لغاری نے مزید کہا کہ انڈسٹریل اسٹیٹس اور اکنامک زونز بجلی کی تقسیم کا اپنا نظام چلانے کے قابل ہو جائیں گے۔