نواز اور مریم گروپ مذاکرات کی ناکامی پر خوشی سے پھولے نہیں سما رہا، بیرسٹر سیف

مشیر اطلاعات خیبرپختونخوا بیرسٹر محمد علی سیف نے مسلم لیگ (ن) کے قائد نواز شریف اور وزیراعلیٰ پنجاب مریم نواز کو مذاکرات کی ناکامی کا باعث قرار دیتے ہوئے کہا کہ ان کی مذاکرات ناکام کرانے کی کوششیں کامیاب ہو گئیں، نواز اور مریم گروپ مذاکرات کی ناکامی پر خوشی سے پھولے نہیں سما رہا۔

بیرسٹر ڈاکٹر سیف نے بدھ کو جاری ایک بیان کہا کہ نواز شریف نے عرفان صدیقی کو مذاکرات کی ناکامی کا ہدف دیا تھا، اور اس کے بعد عرفان صدیقی اور رانا ثناء اللہ کے بیانات سے حکومت کی غیر سنجیدگی واضح ہو گئی تھی۔

انہوں نے مزید کہا کہ جوڈیشل کمیشن نہ بنانے سے یہ واضح ہو گیا ہے کہ ”چور کی داڑھی میں تنکا“ ہے۔ وفاقی حکومت کو خدشہ ہے کہ جوڈیشل کمیشن کی تشکیل سے جعلی حکومت کی حقیقت بے نقاب ہو سکتی ہے۔  حقیقت کھل جانے کے بعد جعلی حکومت کو منہ چھپانے کی جگہ نہیں ملے گی۔

انہوں نے یہ بھی کہا کہ نواز شریف کو سیاسی عدم استحکام میں اپنی بقا نظر آ رہی ہے، اور اسی لیے وہ اس صورتحال کو مزید پیچیدہ بنانے کی کوشش کر رہے ہیں۔