بیٹ مین کے کردار سے مشہور ہالی وڈ اداکار ویل کِلمر 65 سال کی عمر میں چل بسے

لاس اینجلس :ہالی وڈ کے مشہور اداکار ویل کِلمر 65 سال کی عمر میں دنیا سے رخصت ہو گئے۔
امریکی میڈیا کے مطابق ان کی بیٹی مرسڈیز کلمر نے ان کے انتقال کی تصدیق کی، وہ کچھ عرصے سے نمونیا میں مبتلا تھے اور لاس اینجلس میں انہوں نے آخری سانس لی۔
1959 میں امریکی ریاست کیلیفورنیا میں پیدا ہونے والے ویل کِلمر نے نیویارک کے معروف اداکاری اسکول جُولیارڈ سے تعلیم حاصل کی۔ وہ اپنے طویل بالوں، پرکشش شخصیت اور بہترین اداکاری کی بدولت وہ نوجوانوں میں خاصے مقبول تھے۔
ویل کِلمر نےاپنے کیرئیر کا آغاز 1984 میں فلم ’ٹاپ سیکریٹ!‘ کے ذریعے فلمی دنیا میں قدم رکھا، جس کے بعد انہوں نے 1986 میں ریلیز ہونے والی بلاک بسٹر فلم ’ٹاپ گن‘ میں ٹام کروز کے ساتھ کام کیا، جس سے انہیں عالمی سطح پر شہرت ملی۔
ویل کلمر 1995 میں ریلیز ہونے والی فلم ’بیٹ مین فار ایور‘ میں انہوں نے بیٹ مین کا کردار نبھایا، جسے مداحوں نے بے حد سراہا۔
خیال رہے کہ ویَل کِلمر 90 کی دہائی میں ہالی وڈ کے نمایاں اداکاروں میں شمار کیے جاتے تھے۔ انہیں 2014 میں گلے کے کینسر کی تشخیص ہوئی تھی، تاہم علاج کے بعد وہ اس بیماری سے صحت یاب ہو گئے تھے۔ لیکن حالیہ دنوں میں ان کی طبیعت خراب رہی، جس کے باعث وہ جانبر نہ ہو سکے۔